Shillong, Jylliew, 23: Ka All Khasi Hills A`chik Forum (AKHAF) ha ka sngi Balang ka la phah da ka jingthoh sha u Myntri ka tnat Kam Pohïing ka ri u Amit Shah ban ïathuh shaphang ka jingduna bam ha ki ar tylli ki District jong ka Jylla Meghalaya kiba la shah lynshop tyngeh ha ka jinglynshop jong ki bor ka mariang.
“Ki paidbah kiba sah ha ki shnong kiba hap hapoh ka Ranikor CR&D Block ,South West Khasi Hills ki la shah ktah haduh katta katta ha ka jinglynshop jong ki bor ka mariang na ka jingther jong u lapbah uba jur. Ki longing longsem ki la mad jingeh na ka daw ka jingkyrduh bam, ka jingbym biang ka jaka sah bad ka jingbym don ka network mobile phone bad ka jingbym don bording bad kiwei kiwei ki jingeh ba ki ïakynduh,” ong u Publicity Secretary ka AKHAF u Sanggra Marak.
U la ong, u khaw, ki dukan bad ki iew ki la shah ktah bha na ka jingther jong u lapbah uba jur.
“Ka surok PWD kaba pynïasoh na Ranikor sha Baghmara kaba dei ka surok ba ki paidbah ki ju ïoh ban pyndonkam ha kane ka thaiñ ka la shah ktah bha ha ka jingtwa khyndew bad ka leit ka wan jong ki kali ka la sahkut,” u la ong.
Ki shnong kiba hap hapoh ka South West Khasi Hills ki long ka thaiñ Moheshkola, ka thaiñ Ranikor, ka thaiñ Ryngku bad ka thaiñ Rengdim nalor ka thaiñ Kallu kaba hap hapoh ka Mawshynrut C & RD Block, West Khasi Hills.
“Ki paidbah kiba im ha kine ki shnong kiba la shah ktah ki la sah ha ki ktem sah ba shipor ki la pan jingïarap na ka Sorkar bad na ki bor ba dei peit. Ki paidbah ki ïoh tang ar song u khaw haduh mynta. Lada ka Sorkar kam pynbiang ïa ka bam ka dih bun na ki paidbah kin sa ïap thngan,” u la ong.
Lah ban kdew hangne ba u Myntri Rangbah ka jylla, u Conrad K. Sangma, u la leit jurip bad jngoh ïa kiba bun tylliki Shnong ha South Garo Hills, kaba long ka District kaba la shah ktah eh ha kane ka jingshlei um ha jylla., Nangta na ka liang ki bor Shipai suiñ ruh ki la ïarap ban pynpoi marbam sha ki katto katne tylli ki Shnong kiba ym lah shuh ban pynpi da ki kali namar ka jingshlei um bad ka jingtwa ki surok naduh ba la jur u slap ha kane ka taiew baladep, kaba la shim ruh bun ki jingim briew.
