Mairang, Naiwieng 11: U Syiem jong ka Hima Nongkhlaw, u Pa’iem Phrester Manik Syiem, u la kyntu ïa ka sorkar ba kadei ban ai C&RD Block noh ïa ka thaiñ Nongkhlaw kum ka dak ban pynsah ïa ka nam jong u Tirot Sing Syiemlieh, u Syiem jong ka Hima Nongkhlaw.
U Pa’iem ula pynpaw ïa kane ha ka jingïalang rakhe dap shi snem ka Eastern West Khasi Hills District kaba la long ha Mairang ha ka 10 tarik mynta u bnai. U Pa’iem ula ong ba ha ki sngi kiba ladep, u Myntri Rangbah ka jylla, u Conrad Sangma, u la leit plie ïa ki artylli ki C&RD Block, kawei ha Siju, West Garo Hills bad kawei pat ha Rambrai, West Khasi Hills District. Nangta ha kine ki sngi ban wan ruh sa ka Lumshnong ruh kan ïoh ïa ka C&RD Block. “Ka North Eastern West Khasi Hills ruh kadei ban ïoh sa kawei ka Block bad ka Nongkhlaw kadei ka thaiñ kaba biang ban ïoh”, la ong u Pa’iem.
Ha kane ka jingkren, u Syiem u la kyntu ruh ïa u Metbah Lyngdoh, uba long u MLA jong ka Mairang Constituency bad u Shongknor jong ka ïingdorbar Thawaiñ jong ka jylla ban ïakren bad ki bor sorkar bad khamtam bad u Myntri Rangbah ban pynïoh C&RD Block ïa ka Nongkhlaw.
U la ong ruh ba ka jingïoh Block ka Nongkhlaw kan long ka jingkyrkhu kaba khraw ïa kane ka thaiñ bad kan long ruh ka burom na ka bynta u Syiem bakhraw jong ka Hima, u Pa’iem Tirot Sing Syiem.
Kumba long mynta ka North Eastern West Khasi Hills ka don artylli ki C&RD Block, kata ka Mairang bad ka Mawthadraishan. Ha ka jylla mynta ki don 48 tylli ki C&RD Block bad ka Lumshnong kumba la pynbna ba kan ïoh kan dei ka Block kaba 49 bad lada jia ba ka Nongkhlaw ka ïoh shisha kumba angnud u Syiem ka Hima Nongkhlaw ka mut kan long ka C&RD Block kaba sanphew.
