Pan beit da ka RTI, kyntu u CM ïa ki paidbah ban tip la ki MLA ki pyntreikam hok neem ïa ka skim

By Mawphor Editor On Nov 14, 2025

Shillong, Naiwieng 13 : U Myntri Rangbah ka jylla u Conrad K Sangma ha ka sngi Palei u la kyntu ïa ki paidbah ban pan da ka RTI khnang ba kin tip bniah la ki skhim MLA bad MP ki treikam hok ne em ha ki constituency ba la bat da ki party ba don ha ka Liang Pyrshah kiba kam ba ka roi ka pa ka duna ha kito ki jaka.
“Teng teng nga ju peit ïa ki constituency bapher bapher, khamtam eh ha ki jaka ba don ki MLA ka liang pyrshah ka don ka jingduna ka roi ka par. Nga artatien la ki skhim MLA ki pyndonkam hok ne em ha kine ki constituency,” ong u Conrad haba kren ha ka jingïalang pdiang burom ïa u MLA bad MDC barim ka Nongkrem, Bah Lambor Malngiang ha janmiet sngi Palei ha ophis treikam ka NPP.
U Conrad u kyntu jur ruh ïa ki paidbah ba ki dei ban pan beit da ka RTI ban lap ïa ka jingshisha.
“Nga kyrmen ba ki paidbah na kito ki thaiñ kin ïaid shakhmat ban pan da ka RTI ban wad jingtip la ki MLA ki pyntreikam hok neem ïa ki skhim MLA jong ki ne em, kumno ki MP ki pyntrei hok ïa ki skhim jong ki ne em. Sngewbha pan da ka RTI,” u la kyntu.
Ha kajuh ka por u la pynpaw ruh ka jingsngewsih halor ka jingbym don ka jingïatrei lang bad ki katto katne ki MLA ka Liang Pyrshah da kaba kdew ba ki don katto katne ki MLA ka Liang Pyrshah kiba kyntait wat ban kynduh ne wat ban ïakren ïa u Myntri Rangbah, kaba long ka dawbah kaba ktah ïa ka jingpyrshang ban wanrah ïa ki kam pynroi.
“Ha ka jingsynshar, ka don beit ka Liang Pyrshah bad ka Lïang Synshar, hynrei na ka bynta ka kam pynroi jong ki paidbah wat ki MLA ka Liang Pyrshah kin donkam beit ïa ka jingïarap jong ka sorkar jylla. Kumne ka synshar paidbah ka treikam bad ka sorkar ruh ka treikam, ” u la bynrap biang.
Shuh shuh u ong ruh ba ki nongmihkhmat paidbah kiba leh sting ïa ka lyngkor ba la bynshet ki dei ban ai jingkhein sha ki paidbah. U ong ruh ba watla ka sorkar ka ïakhun ban wallam ïa ki kam pynroi bapher bapher hynrei tang na ka daw ba kam don ka jingïatrei lang ka pyndkoh lut ïa ka jingthmu baroh.
Ha kajuh ka por na ka liang u President ka Party, Bah Prestone Tynsong u la ong ba ha u snem 2023 ka jingrem jong u Bah Lambor Malngiang kadei namar u ialeh pyrshah ia ka NPP bad kumta ha kaba kut baroh ar ki ia liem lang. Hynrei mynta pat u ong ba namar baroh ar ki la iatrei lang kum kawei ka kynhun khlem pep ka jingkyrmen kaba skhem kan long ia ka party ha ka elekshon ban wan.