Palat spah tylli ki bilor kyiad kurup ka VDP, Seng Longkmie bad JACASE Mawkyrwat

Mawkyrwat, ‘Naiwieng 18: Ka Village Defense Party (VDP), Mawkyrwat ryngkat ka Seng Longkmie bad ki dkhot jong ka JACASE ki la ïoh ban kurup ïa ki 4 byrni ka kyiad pyrsi bad da ki spah tylli ki bilor kyiad be-aiñ napoh Mawkyrwat, South West Khasi Hills District.
Lah ban kdew ba ka jingïoh kurup jong ki ka long da ka jingthmu ban rad dyngkong ïa ki kam sniew kum ka kyaid bad u durok kiba long ki jingdih kiba pynsniew ïa ka longbriew manbriew bad ïa ka imlang ka sahlang.
U bah D.D. Thongni uba dei u President jong ka VDP Mawkyrwat bad u bah Ferdinand Iawphñiaw uba dei u President jong ka JACASE haba kren ha ki lad pathai khubor hadien ba ki la pyndep ïa ka jingtheh ïa ki kyiad ba la ïoh kurup ki la ong ba kum ki nongpeit ïa ka bha ka miat hapoh jong ka shnong Mawkyrwat da ka jingtrei shitom jong ki dkhot ryngkat ka jingthmu ban ym shah da lei lei ban pynlong ïa ka shnong Mawkyrwat kum ka jaka ïa die kyiad, die drok, ïa khalai bad kiwei de ki kam sniew kiba ktah ïa ka shongsuk shongsaiñ ha kaba ha kine ki khyndiat sngi ki la ïoh ban kurup noh kaba da ki spah tylli ka kyiad be-aiñ napoh ka shnong Mawkyrwat.
Ïa kine ki kyiad ba la ïoh kurup da ka VDP bad Seng Longkmie ryngkat ka JACASE ki la leit theh noh sha ka jaka ba ki la dep pynbeit bad nangne shakhmat kin sa pynkhlaiñ shuh shuh ban nang ïai buddien ban lap sa ïa kiwei de ki briew kiba ju ïaleh pyrshah ïa ki kyndon jong ka shnong khnang ba ka suk ka saiñ kan wan phai biang kumba long ha ki por ba la leit.