Mairang, Jylliew, 08: Ka Ophis jong u Sub-Divisional Education Officer (SDSEO) jong ka Eastern West Khasi Hills District, ha ka jingïatreilang bad ki tnad sorkar kiba kynthup ïa ka Agriculture, PHE, Food Safety and Civil Supplies, Health, C&RD Block, bad ka NESFAS Shillong, ka la pynlong ïa ka jingai jinghikai ba ar sngi halor ka PM Poshan Scheme. Ïa kane ka jingai training la pynlong ha ka 5 bad 6 tarik mynta u bnai ha St. Thomas Higher Secondary School, Mairang.
Ka jingthmu jong kane ka training ka long ban pynsngewthuh ïa ki nonghikai halor ka scheme PM Poshan bad kumno ban pyntreikam ïa ka ha ki skul. Ka PM Poshan scheme ka dei ka skhim sorkar pdeng kaba don ïa ka jingthmu ban pynïoh ïa ki jingbam kiba tei met kiba ïarap ïa ka koit ka khiah jong ki khynnah skul lyngba ka jingbam sngi ne ka mid-day meal.
Ïa kane ka training la pynlong kyrpang na ka bynta ki nonghikai skul kiba hap ha ka Mairang and Mawthadraishan Block jong ka Eastern West Khasi Hills District bad palat spah ngut ki nonghikai na kylleng ki skul ki la wan ban ïashimbynta.
