Palat spah ki trok ba kit palat pud ïa u mawsalin ki hiar sha Bangladesh : Dikkanchi

Shillong, Nailur 13 : Ka MLA jongka Mahendraganj ka Dikkanchi D Shira ka la ïathuh hapoh ka ïing dorbar thawaiñ ka jylla mynta ka sngi ba da ki spah tylli ki trok ba kit palat pud ïa u mawsalin ki ïaid pynhiar maw sha kad khaïi Mahendraganj. Kine ki trok ki ïoh ïaka Transit Pass (TP) tang 12 metric ton katba ki kit palat pud ym duna ïa ka 30 haduh 40 matric ton bad kane ka la wanrah ka jingduh nong kaba khraw ïa ka jylla na ka khajna.
Haba wanrah ïa ka jingkylli hato la dep shna ne em ïa ki weigh bridge ban thew ïa kine ki trok hashwa ban rung sha ka kad khaïi ha Mahendraganj, u bah Renikton L Tongkhar myntri ka tnad Legal Metrology ula jubab em. Kumta ka Shira ka la ong lada ym pat don kita ki weigh bridge kumno yn thew ïa ki trok ba kit palat pud.
Hangne u la ong ban buh ne shna ïa ki weigh bridge ka dei ka tnad Transport kam dei ka tnad jongu. Kumta ka tnad jongu kam don bynta ne lah ban tuklar halor kane ka kam. Ha kum kane ka por na ka liang u MLA ka Rangsakona u Zenith Sangma u la ïeng bad kylli haba kumta mano ba don bor ban jubab halor kine ki jingkylli hapoh ka ïing dorbar namar la shu ïa khynniat na kawei ka tnad sha kawei ka tnad bad haba buh ïa kane ka jingkylli kumno la ai ban jubab da ka tnad Legal Metrology, na ka liang u Myntri Rangbah ula ïeng bad jubab ba namar ba la ai ïa kane ka jingkylli sha kane ka tnad kumta u bah Renikton u la ïeng ban jubab.
Halor kane ka Shira ka la pynshai ba ka la phah ïa kane ka jingkylli sha ka tnad transport bad kam tip ba ïa kane ka jingkylli pat la phah ban jubab da ka tnad legal metrology.
Na ka liang u myntri rangbah u la ong ba lada ka long kumta, un sa wad bniah mano ban leh stad ban phah ïa kane ka jingkylli na ka tnad transport sha ka tnad legal metrology. U la kular ba un wad jingtip bniah bad un sa ai jingtip sha ka Dikkanchi halor kane.