Nongstoiñ, Ïaiong 19: Ïa ka Block Health Mela la pynlong ha ka sngi nyngkong jong ka taiew hapoh ka shnong Umdang kaba hap ha Mawshynrut Block ba la pynïaid da ka ophis jong ka DM&HO, Nongstoiñ. Ka jingthmu ban pynlong ïa katei ka Mela ka long ban pynsngewthuh ïa ki paidbah ïa ka jingdonkam ïa ka koit ka khiah kaba paka ban lap ïa ki jingpang kum ka Diabetes, BP, TB, Cancer, pang ki khmat bad kiwei kiwei ki jingpang lyngba ki jing phah test ba man ka por.
Ha kane ka Health Mela la ïoh ïa ka jingkren na u Dr R Laloo MCHO West Khasi Hills, u ba la pynshlur ïa ki nongshong shnong ban wan shakhmat ban ïoh ïa ki injection kiba tikna, ban leit kha ruh ïa ki khunlung ha ki jaka sumar bad ban shim ïa ka tika Covid-19.
Katba u Dr W Sutnga, DNO CPHC u la batai ïa ka CPHC programme hapoh ka District bad ïathuh ba ki don 50 tylli ki HWCs ïa mynta ha kaba 34 ki dei ki SC HWC, 15 tylli ki PHC HWC bad kawei ka UPHC HWC bad u la ïathuh ruh ba hadien ka jingkyntiew kyrdan ïa ka SC bad PHC sha ka HWC, ki paidbah ki la ïoh ïa shibun ki jingmyntoi.
Kiwei kiba la ai jingkren ki long bah S Syiemlieh BDO Mawshynrut ba la pynïaid ïa ka jingïalang, kong K Maya Lakiang CDPO, Mawshynrut, Dr S Lyngdoh DM&HO bad Dr Aimal Sangma M&HO, Shallang. Ha kane katei ka sngi la register 65 ngut hapoh ka ABHA bad total OPD pat 568 ngut.
