Shillong, Naiwieng 27 : Ki la don haduh 1441 ngut ki nongmareh kiba la wan shimbynta ha ka jingïakop mareh thong kaba la tip da ka 3rd Half Marathon ba la pynïaid da ka Assam Rifle, ha Headquarters of Directorate General Assam Rifles, Laitkor, Shillong, kum shi bynta ban saphriang ïa ka khubor “Fit India Movement”.
Kane ka jingïakop mareh thong la pynlong na bynta baroh kynthei bad shynrang kiba la 18 snem shalor bad ka la long kaba seisoh ha ryngkat ka jingwan ïashimbyntalang ki dkhot na ka Assam Rifles, 101 Area, Eastern Air Command, CRPF, CISF, SSB kumjuh ruh na ki ba na ka tnat Pulit Meghalaya.
ïa kane ka jingïakop mareh thong la ïoh ban bynta ha ki ar kyrdan, kawei ka long haduh 21 Kms katba kawei pat ka long 10 Km. Ki la don haduh 747 ngut kiba la mareh ïa ka 21 Km, bad 694 ngut kiba la mareh ïa ka10 Km.
Ha kane ka sngi la wan kongsan da u Lat ka jylla, u Phagu Chauchan u ba la ai ka jingïaroh ïa baroh kiba la wan ban shimbynta ha katei ka ïakop mareh ba la pynlong ha ka step sngi U Blei (26 tarik Naiwieng) u ba la sam ruh ïa ki khusnam sha ki nongjop.
Ki nongmareh ha ka 21 Km ki long 290 ngut ki ba dang hapdeng ka 18 haduh 30 snem, ki don haduh 199 ngut kiba hapdeng ka 30 haduh 40 snem,123 ngut kiba dang hapdeng 40 haduh 50 snem bad 135 ngut kiba la palat ïa ka 50 snem.
Napdeng ka thup kiba hapoh 30 snem la jop da u Emphius Nongrum ha ka 21 Km katba ka Bandasharai Marwei ka la wan ba nyngkong ha ka thup kyrdan ki kynthei. Katba ha ka jingïakop mareh ba 10 Km, ka namjop la ïohrah da u Iohborlang Nongspung katba ka Marqueenless ka la jop na ka liang jong ki kynthei.
