Palat 90 klur yn ïoh lum tang na khajna kyiad hadien ba wanrah ïa ka kyndon thymmai

Shillong, Nailur 11 : Ka Meghalaya kan sa ïoh lum tam sa 90 klur tyngka hadien ba ka sorkar jylla ka la mynjur ïa ka Meghalaya Excise Amendment Rules 2025.
Katkum kane ka amendment, kan phiah kyrdan ïa ka kyiad (IMFL brand), nangta ka jingbuh kyrdan la ka jong ïa ki jait jingdih kiba kham long kynrei ne ba pyndonkam paidbah, bad ka jingpynthymmai biang ïa ka khajna ha ka beer katkum ka dor bad ruh ka jingpynkylla ïa kiba bun ki kyndon.
Haba kren bad ki lad pathai khubor hadien ka jingïalang jongka kynhun Myntri, u Myntri Rangbah ka Jylla, Conrad K Sangma u la ong ba ïa ki kyiad IMFL (Indian Made Foreign Liquor) yn sa phiah kyrdan thymmai biang khnang ba ki nongdih kin ïoh ban jied. Nangta u ong ruh ba kin sa pynmih ïa ka kyrdan kaba thymmai kaba long salonsar ïa ki paidbah khnang ba ki nongpyndonkam kin ïoh ban jied kat kaba ki mon.
La ïathuh ruh ba ïa khajna na bynta ki beer ruh yn sa pynthymmai khnang ban khring shuh shuh ïa ki nongpyndonkam katkum ka dor.
U Myntri Rangbah u la pyntip ruh ba kin don bun ki kyndon kiban pynkylla kynthup naduh ka Rule 44(12), Rule 37(2)(1)(B), Rule 71(a), Rule 273, bad ka Rule 274.
U Myntri Rangbah u ong ruh ba da kaba leh kumtei, ki khmih lynti ba ka sorkar kan ïoh ban lum tam kumba 90 klur ka khajna.