New Delhi, Jylliew, 13:U Myntri ka tnat Kam Pohiing bad Cooperation jong ka Sorkar Pdeng, u Amit Shah u la lum jingïalang bad ki Myntri ba dei khmih ïa ka tnat Disaster Management jong ki Jylla/Union Territory ha VigyanBhawan ha New Delhi, ha ka sngi Baar.
Hapoh ka thong @2047 jong u Myntri Rangbah duh, u Narendra Modi, ka jing thmu ba kongsan jong ka jingïalang ka long ban pynkhlaiñ shuh shuh ïa ka rukom pynduna ka jingma na ka jinglynshop ki bor ka mariang ha ka ri ban pynlong ïa ka India kaba lah ban ïaleh pyrshah ïa ki jinglynshop bad ban ïamir jingmut ïa ki jingeh bapher bapher ba ïadei bad ka jingïada na ki jingjia lynshop ki bor mariang bad ki bor pynïaid jylla bad ki Union Territory.
U Amit Shah u la pynbna lai tylli ki skhim ba kongsan kiba palat T. 8,000 klur kiba ïadei bad ka jingïada na ki jingjia lynshop ki bor ka mariang ha ka ri.
Ka projek kaba T. 5,000 klur ban pynïar bad pynthymmai ïa ki kam pynlip ding ha kylleng ki jylla
Ka projek kaba T. 2,500 klur ban pynduna ka jingma jong ka jingshlei um ha hynniew tylli ki nongbah ba bun briew tam – Mumbai, Chennai, Kolkata, Bengaluru, Hyderabad, Ahmedabad bad Pune
Ka projek National Landslide Risk Mitigation kaba T. 825 klur ban ïada na ka jingtwa khyndew na ka bynta 17 tylli ki Jylla bad ki Union Territory
U la ong kadei ban long ka jingpyrshang tyngeh jong ngi ba iwei i briew im dei ban duh ïa ka jingim namar ki jingjia lynshop ki bor mariang, bad hapoh ka jingïalam u Myntri Rangbah duh u Modi, baroh ki jylla ki la trei borbah ban kot sha kane ka thong ha ki 5 snem ba la leit
U la ong ba ki jingïamir jingmut ha ka jingïalang kilong kiba kongsan na ka bynta ban thaw bad pynthymmai ïa ki polisi ha ka ri. U la ong ba ka sorkar pdeng bad ki Jylla ki la kot sha shibun ki mawmer ha ki khyndai snem ba la leit, hynrei ngim lah ban shu hun tang hangta. U la ong ba ka jinglong ki jingjia lynshop ki bor mariang ka la kylla, ka jingjia bad ka bor ruh ka la kiew, dei namar kata ngi hap ban kyntiew bad pynïar ïa ki jingpynkhreh jong ngi ban weng ïa kine ki jingeh. U la ong la lap bun ki jingjia lynshop ki bor mariang kiba dang thymmai ha ki jaka bapher bapher, bad ngi hap ban pynkhreh ïalade na ka bynta kine.
U Shah u la ong ba hadien u 2004, hadien ka jingïaphylliew jingmut halor ka jingïada ïa ki jingjia lynshop ki bor mariang ha ka ri, la wanrah ïa ka rukom treikam kaba baroh ki don ka jingkitkhlieh ha ka kyrdan jong ka sorkar pdeng bad ki Jylla. U la ong ba ha ka por jong ka khlam Covid-19, ka sorkar pdeng bad ki jylla, hapoh ka jingïalam jong u Myntri Rangbah duh u Narendra Modi, ka la lah ban ïakhun ïa kane ka khlam. Ha katei ka por jong ka jingeh, ka sorkar pdeng, ki jylla bad ki paidbah ki la buh ka nuksa kaba biang bha sha ka pyrthei ban ïakhun lang ha man ka bynta. U Shah u la ong ba hapoh ka jingïalam jong u Myntri Rangbah duh, u Narendra Modi, ka sorkar ka la pynïoh ei palat 220 klur ki dawai tika na ka bynta ka Corona, ka la pynbiang jingbam ïa ki klur ngut ki briew ba duk, ka la ïarap ban pynpoi ïa ki lak ngut ki nongbylla sha ki shnong jong ki bad ka la pynbeit ban weng ïa ki jingeh jong ki lyngba ka DBT.
U la ïathuh ba haduh katto katne snem mynshuwa, ka rukom treikam jong ngi ka dei kaba ap ïa ki jingjia bad ai jingïarap. U la ong ba ha ki 9 snem ba la leit, hapoh ka jingïalam jong u Myntri Rangbah duh, u Narendra Modi, ryngkat bad ka jingtrei shitom jong baroh bad ka jingaiti ngi la pyntreikam ïa ka rukom treikam kaba ai jingtip lypa, kaba ïada, pynduna jingma bad pynkhreh lypa. U la ong ba ka sorkar Modi ka la buh thong ban pynkhreh kumba shi lak ngut ki volunteer ha 350 tylli ki distrik kiba kham jia ki jinglynshop ki bor mariang, ngi la ïoh ki resol kiba bha ha ki por jong kine ki jingjia. U Shah u la ong ba hapoh ka jingïalam jong u Myntri Rangbah duh, u Narendra Modi, ka sorkar pdeng ka la shim ïa ki sienjam ban ïarap ïa ki jylla ha ki saw snem ba ladep da kaba phah ïa ki kynhun IMCT haduh 73 sien hapoh ka por ba la buh kaba tang 10 sngi. U la ong haba ïanujor bad ki 9 snem naduh u 2005-06 haduh 2013-14 bad 2014-15 haduh 2022-23, ka pisa ba la mang kaba T. 35,858 klur sha ka SDRF mynta ka la kot sha ka T. 1,04,704 klur kaba la jan lai shah. Shuh shuh, ka jingpyllait pisa na ka NDRF ka la kiew jan lai shah na ka T. 25,000 klur sha ka T.77,000 klur. U la ong ba namar ka jingpeit lypa, ka sorkar pdeng bad ki Jylla ki la kyntiew ïa ka jingmang pisa ha ki bynta ba ïadei bad ka jingpynduna ïa ki jingma na ki jinglynshop ki bor ka mariang bad ka jingai jingïarap hadien ki jingjia. U la ong ba ha u snem 2021, la thaw ïa ka National Disaster Mitigation Fund hapoh ka sorkar pdeng kaba don T 16,700 klur bad hapoh ka SDMF, la pynbiang T. 32,000 klur na ka bynta ki kam ban pynduna jingma na ki jinglynshop ki bor ka mariang.
U Shah u la ong ba la buh jingtip ïa ka India Disaster Resource Network ha kylleng ka ri bad palat shi lak ki rekod ba thymmai la pynrung ha ka. La buh kyndon ban pyntreikam ïa ka Common Alerting Protocol lyngba ka SMS ha ka jinglut kaba T. 354 klur. Ki sienjam kum ka rynsan Disaster Management Information System, 112 Emergency Response Support System kilong ki ïarap bha bad ki sienjam kiba bun bynta. U la ong ba u Myntri Rangbah duh, u Narendra Modi u la sdang ïa ka rukom ban ai khusnam Subhash Chandra Bose AapdaPrabandhanPuraskar sha ki briew bad ki kynhun kiba la nohsynniang ha ki kam ban peit ïa ki kam kiba ïadei bad ka jinglynshop ki bor ka mariang. U Shah u la ong ba ka la pynshlur shibun ïa ki briew bad ki kynhun kiba trei ha kane ka kam.
U la ong ba la ithuh 271 tylli ki jaka shong um ha ka thaiñ shatei lammihngi da ka ISRO na ka bynta ka jingïada na ka jingshlei um ha ka ri. Hashuwa kane, ka IMD ka ju ai jingtip lypa lai sngi shaphang ka jinghap slap bad ka jingshlei um namar kane, mynta la pyllait lypa ha ki 5 sngi kaba ai por na ka bynta ki kam pyllait im, la pyllait ïa ki jingbthah ban ai jingtip lypa 7 sngi shuwa u snem ban wan. U la bynrap ba ïa ki jingshlei um la peit da ka Tnat Environment, Forests and Climate Change da kaba thung ki tynrai dieng ha ki rud jong 13 tylli ki wah ba kongsan ba ju jia bha ki jingshlei um.
U ong ba ka NDMA ka la leit jngoh ïa 7 tylli ki jaka pynmih bording ha kylleng ki jylla ha kaba dang pyntrei ïa ki nuclear power plant bad la phah ïa ki kyndon ba tyngeh sha ki jylla na ka bynta ka jingpyllait ïa ki briew lada don ki jingjia ba kyrkieh. U Shah u la ong ïa ki Myntri jong ki jylla ba kin peit bniah ba shuwa ban sdang ïa kine ki plant, ki dei ban pynbiang ïa ki lad jingïada. U la ong ba la pynlong ïa ki workshop ha ki 23 tylli ki jylla kiba don ka suin bneng kaba shit. U Shah u la ong ba katto katne ki jylla ki la ai jingmut ban siew bai lutksan sha ki nongrep, ka sorkar kan sa peit halor kane. U la ong ba ki jylla kidei ban kyntiew ïa ka jingmang pisa na ka bynta kane. U la bthah ïa baroh ki jylla ban pdiang ïa ka Model Fire Bill bad wanrah kawei ka aiñ ha kylleng ki jylla. U Shah u la ong ba baroh ki kam ba la rai na ka bynta ka jingai jingpyntip lypa ki la dep. U la ong ba ka jingpynkhreh na ka bynta ka District Disaster Management Plans ha 87 tylli ki distrik jong 8 tylli ki jylla ki dang sahteng, bad ïa kane yn sa pyndep noh shen. U la ong ba ka sorkar pdeng ka la phah ïa ka State level action plan na ka bynta ka lailieh bad ka eriong haduh mynta palat 25 tylli ki Jylla bad ki Union Territory kim pat ïasam ïa kane bad ka sorkar pdeng. U la ong ba ngi dei ban shimkhia khnang ba kan nym don ka jingduh mynsiem briew namar ka jingshah pom pyrthat bad kumta baroh kine ki 25 tylli ki jylla bad ki union territory kidei ban ïaid shaphrang ha kane ka bynta. Ka sorkar pdeng ka la phah ïa ka State-level action plan halor ka jingkhriat kynsan bad ka jingtap lyoh sha ki Jylla bad ki Union Territory, bad 16 tylli ki Jylla bad ki UT kim pat pynkhreh ïa ka rukom treikam jong ki na ka bynta kane. Baroh kidei ban pyndep noh kloi katba lah. U Shah u la ong ba la pyntreikam ïa ka Incident Response System ha 20 tylli ki Jylla bad ki UT hynrei 16 tylli ki jylla kim pat pyntreikam ïa ka.
Ha kane ka jingïalang, la ïakren halor ki phang ba ïadei bad ka jingpynkhreh ïa ki jinglynshop ki bor ka mariang, ka jingpynduna jingma, ka rukom treikam, ka jingshngaiñ ha ki nuclear power plant, ki lad ai jingtip lypa, ka jingpyndonkam ïa ki pisa ba la buh na ka bynta ka jingpynduna jingma, ka jingseng bad jingpynkhlaiñ ïa ki State Disaster Response Force (SDRF), ki State Disaster Management Authority (SDMA), ki District Disaster Management Authorities bad ka jingpynshlur ïa ka jingtrei mon sngewbha jong ka imlang sahlang ha ka jingpynkhreh ïa ki jinglynshop ki bor ka mariang, ka jingpyntrei kam bad ka jingpynduna jingma.
Ki Myntri bad ki dkhot jong ki sorkar jylla bad ki Union Territory ki la ïasam ïa ki jingtip ba kongsan halor ki jingeh ba la pynsngew ha ka jingïalang. Ki la ïasam ruh ïa ki rukom treikam ba la bud da ki jylla jong ki bad ki jingai jingmut halor ki jingeh ha ki por ban wan ha ka jingïada ïa ki jingjia lynshop ki bor ka mariang.
Ha ka jingïalang ba la ïashim bynta lang da ki Myntri Rangbah jong ki Jylla/ki Myntri, ki Lieutenant Governor/Administrator jong ki Union Territory, ki heh ophisar jong ka Tnat Disaster Management jong ki sorkar Jylla/ Union Territory, Dkhot, (NDMA), Director General, (NDRF), Director General (FS, CD and HG), Executive Director, (NIDM) bad ki heh ophisar jong ka Tnat kam Pohiing, la pdiang ba ka Sorkar Pdeng bad ki jylla ki la kot sha bun ki mawmer ha ki 9 snem ba la leit. La ban biang ha ka jingïalang ba ka jingïatreilang kum ka kynhun kan ïarap ban pynduna ka jingduh ka jingim briew, ki jingdon jingem bad ka kamai kajih.
