Mairang, Jymmang, 5: Kum shi bynta jong ka jingrakhe ïa ka North East Festival 2022 kaba long shibynta na ka jingrakhe ïa ka Azadi Ka Amrit Mahotsav, ka ophis jong u Deputy Commissioner Eastern West Khasi Hills District, ha ryngkat ka jingïatreilang jong ka ophis u Block Development Officer ka Mairang Block bad ruh ka ophis u Block Development Officer ka Mawthadraishan Block, mynta ka sngi ki la pynlong ïa ka SHG Mela cum Financial Literacy Camp ha Madan Mot Tirot Mairang Mission, Mairang.
Ha kane ka prokram, u Syiem ka Hima Nongkhlaw, u Pa’iem P.M Syiemlieh u la leit kum u Kongsan ha ka jingdon ryngkat u Deputy Commissioner ka Eastern West Khasi Hills District u Bah W.Nongsiej, u Superintendent of Police ka District u Bah M.B Syiem, ki ophisar bad nongtrei jong ki tnad sorkar bapher bapher, ki nongïalam shnong ka thaiñ, ki dkhot jong ki Seng Treilang (SHG) bad kiwei kiwei.
Ha ka jingkren ka jong u kum u kongsan, u Syiem ka Hima Nongkhlaw, u Pa’iem P.M Syiemlieh, u la kren halor ki SHG bad ka bynta kaba khraw ba ki don ban kyntiew ïa ka ïoh ka kot ki paidbah nongshong shnong khamtam eh ki riewkynthei.
U la kyntu ruh ïa kito ki bym pat pynïasoh ïalade ha ki SHG, ba kin leh kumta namar ki SHG ki ïarap ban kyntiew ïa ka mynsiem jong ka jingïatreilang shi tylli bad ka jingïakyrshan markylliang iwei ïa iwei, na ka bynta ka roi ka kiew jong ka imlang sahlang baroh kawei.
Ha kane ka sngi la ïoh ruh ban sam ïa ki sanction ai ram kaba la kot kyllum lang 70 lak tyngka sha ki 26 tylli ki SHG ka thaiñ da u kongsan bad ki kynrem ki lyndan kiba la ïadon ha kane ka prokram.
Ha kawei pat ka prokram ïa kaba la pynlong kum shibynta jong kane ka juh ka jingrakhe, la ïoh ban pynlong ïa ka jingïakob Quiz ha skul Mairang Presbyterian Higher Secondary School, Mairang ha kaba ka Langtor Higher Secondary School, Langtor ka la jop ïa ka kyrdan ba nyngkong, ka Mairang Presbyterian Higher Secondary School, Mairang ka la ïoh ïa ka kyrdan ba ar, katba, ïa ka kyrdan ba lai la ïoh ban rah da ka Mairang Presbyterian Science College, Mairang.
