Nongstoiñ, Nohprah, 6: Naduh ba ka sorkar kam pat ithuh ïa u synsar kum u mar rep, ka West Khasi Hills ka la dei lypa ka District kaba khlaiñ bha ha ka jingpynmih synsar. Wat la ka dor ïew jong utei u synsar kam ju neh satia, hynrei ki paitbah nongshong shnong ki ïabeh bha ban rep namar kim tip satia ha kano ka por u kiew dor bad ha kano ka por u hiar dor.
Ka kong kwistilda Lyngdoh Marshillong kawei na ki nongrep synsar haba ïakren bad u nongthoh khubor, ka la ong ba ha ki snem ba mynshuwa tang ha ka shi sngi ka dor iew dor hat jong u synsar ka lah ban hiar ne ka lah ban kiew.
Teng teng ha ka por mynstep ka dor ka kiew bha ha ka por janmiet pat ka hiar jlang. Tangba watla katei ka jingbym neh dor jong utei u mar rep ka long kumtei ruh, ki paitbah nongshong shnong ki ïoh jingmyntoi bha ha ka ban kyrshan ïa ka ïing ka sem.
Ka la ong ruh ba naduh ba ka sorkar ka la ithuh ïa u synsar kum u mar rep ka dor ïew dor hat ka la kham neh bad ka la kham kiew. Wat la katta ruh ka la ong ba ha une u snem ha kaba sdang jong ka jingpynïaid iew ïa utei u mar rep, ka dor ka mur ka biang bha bad ka poi haduh shi spah lai phew san tyngka shi kilo.
Hynrei ka hiar pat suki pa suki bad ha kine ki sngi ka dor ha ki thaiñ Langpih, ka la hiar sha ka khyndai phew tyngka shi kilo lada u dei u number 1 lada dei number 2 ka dor ka poi tang hynñiew phew haduh phra phew tyngka shi kilo.
Haba kylli pat nalor u synsar kiei kiwei pat ki mar rep ba ki nongshong shnong katei ka thaiñ ki ïabeh bha ban rep, katei ka longkmie ka la ong ba u sying, u kwai , u sohñiamtra bad kiwei kiwei ki jait soh namar ha katei ka thaiñ ki jaka rep kba ki duna haduh katta katta.
Ka la ong ruh ba ha kine ki snem kiba bun ki nong shong shnong ha katei ka thaiñ, khamtam kito kiba don ki jaka kiba biang ban rep kwai ki la ïabeh bha. Ka la ong ruh ba watla ki pait nongshong shnong ki la sdang ban ïabeh ha kaba rep kwai.
Hynrei ki don pat ka jingartatien namar ka khlam kwai ka la sdang wan poi ha katei ka thaiñ. Ka la pynkynmaw ruh ha kine ki snem wat ki dieng sohñiamtra ruh ki la sdang ban ïap tram. Dei tang u synsar u mar rep u ba haduh mynta um pat shah ktah ha kano kano ka khlam.
