Palat 500 ngut ki doktor thung ka sorkar ha ki san snem ba la dep ban pyndap ha ki jaka sumar

Shillong, Nailur 10 : U Myntri Rangbah ka jylla u Conrad K Sangma u la pyntip ba ha kine ki san snem ba la dep, ka sorkar ka la thungkam haduh 500 ngut ki doktor, ha kaba ki don katto katne na kine kiba dang don ha ka jingshah pyntbit, na ka bynta ban ïakhun ïa ka jingduna doktor ha ki Primary Health Centre (PHC) bad ha ki Community Health Centre (CHC).
Kane ka sienjam ka la wanrah ïa ka jingkiew kaba khraw ha ka liang ka koit ka khiah, la ong u Myntri Rangbah ha Iing Dorbar haba jubab halor ka cut motion.
U Myntri Rangbah u la ïathuh ba ka sorkar kala thaw ruh ïa ka Recruitment Board na ka bynta ka tnad ka koit ka khiah, kaba long ka sienjam kaba radbah ban ïakhun ïa ka jingduna ki doktor, u la bynrap.
Hynrei, u Myntri Rangbah u la ong ba wat hapdeng ka jingkiew arted pynban ki jingeh ki dang don nalor ba ki dang don shuh ki kam kiba dang sahteng.
Tangba u la ong ba ka jinglong jingman mynta ka la kham pher bad kham bha shibun ban ïa kaba long ha ki por ba la dep. U la pynpaw ruh ka jingkyrmen ba kan ïai bteng ban nang kham bha shuh shuh ha ki sngi ban dang wan.