Palat 500 klur tyngka shisnem buh thong ka sorkar ban ïoh lum tang pyntreikam ïa ka QR Code

Shillong, Naitung 28 : U Myntri ka tnad Excise ka sorkar jylla, Bah Kyrmen Shylla ha ka sngi Nyngkong u la ong ba ka tnad kan ïoh ban lum palat ïa ka 500 klur tyngka ha ka shisnem ynda ki la pyntreikam ïa ka QR Code system bad ruh ïa ka Integrated Excise Management System (IEMS).
Haba kren bad ki lad pathai khubor, u Myntri u la ong, “Ngi khmih lynti ba ngin ïoh lum palat ïa ka 500 klur tyngka ynda ngi la pyntreikam ïa ka QR Code bda kumjuh ïa ka IEMS. Ka don ruh ka jingkyrmen ba kane ka jingkylla kan ym wan mynta mynta hynrei kan sa paw suki suki lehse ha ki shisnem bad arsnem ei ei.”
Tangbah, u Myntri u ong ba ka jingpynkhreh na ka bynta ban pyntreikam ïa ka QR Code ka long ha ki bilor kyiad ka dang ïai mynta shaid shaid bad la khmih lynti ba shwa ka 15tarik Nailar ne shwa ka Independence Day yn lah ban pyndep noh ïa ka. U la ong ruh ba na ka QR Code kan pynsuk wat ban buddien ïa ka kyiad naduh ka jaka shna haduh ka jaka ba die nalor ba ka pyntikna ruh ïa ka jingbha jong ka haba die ha ka jylla.
“Lyngba kane, kan pyntikna ba dei tang ki kyïad kiba dei hok kin don ha ki jaka die ha kylleng ki bynta jong ka jylla,” u la ong da kaba bynrap ruh ba ka QR Code kan ïarap ruh wat ban lap ïa ki mar kiba la die khlem da ïaid katkum ki kyndon kiba dei. “Ka QR Code kan pyntikna ïa ki nongpyndonkam ba dei tang ki jingdih kiba la ïoh jingbit la die ha ka jylla,” u la ong.
Ha kajuh ka por u Myntri u la ïathuh ruh ba ka sorkar ka la sangeh wat ban ai laisen ban buh ïa ki dukan kyiad ha ki katto katne ki jaka nalor ba kan rai ruh wat ïa ki dukan ba thymmai katkum ka jinglap na ka IEMS.
Nangta u ong ruh ba ka jingai ïa ki laisen thymmai kan dei peit tang ha kito ki jaka ba ym don ki dukan kiad, kata ruh tang lada ki la ïoh ïa ka NOC na ki Rangbah Shnong.