Palat 50 tylli ki shnong ha Mawphlang constituency ki bym pat don surok : Bah L Blah

Shillong, Lber 27 : U MDC ka NPP na Mawphlang ba dei ruh u Chairman jong ka Khasi Hills Autonomous District Council (KHADC) u la ïathuh ba ki don da ki phew tylli ki shnong ha constituency jong u ki bym pat don satia ki surok la bun phew phew snem mynta kaba la buh jingeh haduh katta katta ïa ki nongshong shnong haba don ki jingjia ba kyrkieh.
Haba kren bad katto katne ngut ki nongthoh khubor, utei u MDC u la kyntu ïa ka sorkar ba kan shimkhia lang khnang ba kitei ki shnong kin ïoh ïa ka lynti syngkien kaba biang kumba long lem kiwei pat ki shnong.
“Ki don palat 50 tylli ki shnong ha constituency jongnga ki bym pat don tang ïa ka surok ruh. Kane ka la buh jingeh bha ïa ki haba don ka pang ka shitom ne ka ïap ka im,” u la ong.
Ha kawei pat ka liang u la ong ruh ba la donkam kyrkieh ruh ban kyntiew kyrdan noh ïa ki jaka sumar kiba don ha ka thaiñ kum ki PHC bad ruh ki Sub Centre, kynthup ïa ki jaka pule kiba dang bun ki jingduna khamtam haba ïadei bad ki jingtei kumjuh ki nonghikai.
“Ngi donkam ruh ban buddien bad ka sorkar khnang ba ka Science and Commerce College kaba don ha ka thaiñ kan dep noh bad ba ki samla pule kin ïoh ban bteng ïa ka jingpule ha jaka lajong khlem da donkam shuh ban leit sha Shillong ne sha kiwei ki jaka,” bynrap biang u Bah Blah.
Nalorkata, u ong ruh ba kum u briew uba la don la bun snem ha ka shakri paidbah tang kum u MDC u thrang ban trei bun bha na bynta ka constituency bad ruh ban weng ïa ki jingeh ba ki paidbah ki mad man ka por. Kumta u la kyntu ïa ki paidbah ba kin ailad noh ïa u kum u MLA jong ki ha u 2023.