Shillong, Naiwieng 12 : Ki la don haduh 53 ngut ki khunlung ba dang kha kiba khlad na ka daw ka jingpang pneumonia tang naduh u Iaiong haduh u Nailur mynta u snem.
Ïa kane la pynbna da ka Distric Maternal & Child Health Officer ka East Khasi Hills, Dr. EL Kharmutee ha ka sngi Balang da kaba pynbna ruh ïa ka jingïalap ban leh ei ei mardor ban khanglad ïa ka jingïap ki khunlung kaban sdang naduh ka 12tarik Naiwieng haduh 28tarik Rymphang 2026.
Kane ka jingïalap ka long ban pynstet ki jingïarap da kaba pynjur ki jingïalap paidbah ban pynsngewthuh ïa ka daw ka jingïap na kane ka jingpang kaba ktah jur bha ïa kiba hapoh 5 snem ka rta.
Ka la pyntip ba ki kam ba kongsan kin kynthup ïa ka jinghikai ïa ki nongtrei ka koit ka khiah bad ki nongtrei ba hakhmat eh (ki ASHA, ki nongtrei Anganwadi) halor ka rukom sumar, ki jingpynsngewthuh paidbah lyngba ki Village Health Nutrition Days bad kiwei kiwei.
Ka Dr. Kharmutee ka banjur ruh ïa ka jingdonkam ka jingïatrei lang hapdeng ka imlang sahlang bad ki jaka ai jingsumar ban pynurlong ïa kane ka thong.
