Palat 50 lak ngut ki nongdie jingdie rud surok ki la ïoh jingïarap na ka skhim u PM

By Mawphor Editor On Oct 4, 2023

Shillong, Risaw 03: Ka skhim Prime Minister Street Vendor’s AtmaNirbhar Nidhi (PM SVANidhi), ka sienjam hapoh ka jingkyrshan ka Tnat Housing and Urban Affairs (MoHUA), ka la kot sha u mawmer ba kyrpang ha ka jingai jingïarap jong ka sha palat 50 lak ngut ki briew kiba die jingdie harud surok ha kylleng ka ri.
Ïa kane la ïathuh da u Hardeeep Singh Puri, Myntri ba dei khmih ïa ka Tnat Housing bad Urban Affairs jong ka sorkar pdeng ha ka jingthoh ba u la pynmih lyngba ka Press Information Bureau (PIB) mynta ka sngi.
U Hardep, ula ong ba ki briew kiba die jingdie harud surok ki la long ka bynta ba kongsan ha ka ïoh ka kot ha ki jaka sor, da kaba pynbiang ïa ki mar ba kongsan bad ki jingshakri sha ki briew ba sah ha ki jaka sor. U la ong ruh ba lyngba ka skhim PM Street Vendor’s AtmaNirbharNidhi ka la ïarap ban wanrah ïa ki ha ki kam ka ïoh ka kot kaba skhem bad ban plié lad ia ki ban kiew shaphrang.
Shuh shuh u Myntri u la ong ba ka thong jong u Myntri Rangbah duh, u Narendra Modi ban pynïar ka jingïoh ïa kane ka skhim ka la ai mynsiem ban sdang ïa ki sienjam na ka bynta ban pynïar ïa ka. U la ïathuh ba ïa kane ka skhim la sdang ha ka 1 tarik Naitung, 2023, ka Tnat Housing and Urban Affairs (MoHUA), ka la plie ïa ka campaign, kaba peit bniah biang ïa ki thong ba dei ban pyndep hapoh kane ka skhim. La pynlong ïa ki jingialang bapher bapher bad ka jingpeit bniah ha kane ka samoi, kynthup ka jingpeit bniah ïa ki Public sector bank da ka Myntri ba dei khmih ïa ka Tnat Kam Pla tyngka, ki Zonal State Review ha kylleng ka ri ha ki jaka bapher bapher da u Dr. Bhagwat Kishanrao Karad, Myntri Khynnah ba dei khmih ia ka Tnat Kam Pla Tyngka , kumjuh ruh ki jingïalang peit bniah ha ki Jylla/UT da u Manoj Joshi, Secretary MoHUA bad u Vivek Joshi, Secretary, DFS.
U la ong ba kane ka jingïatreilang ka la ïarap ha ka jingpyllait 65.75 lak ki jingai ram, kaba la long ka jingmyntoi ïa palat 50 lak ngut ki briew kiba die jingdie harud surok, ha ka jingkot kaba palat T 8600 klur. Kum ban shu kdew ki public sector bank ki la leh ïa ka bynta ba kongsan ban kot sha une u mawmer lyngba ka jingkyrshan jong ka skhim kaba nyngkong na ka bynta ka jingai ram kiba rit ba la saiñdur ïa ki briew kiba duna jingioh ha ki jaka sor.
Ki Jylla ki la pdiang kylluid ïa kane ka skhim, bad ka campaign kaba dang shen ka la long kaba jop. Ha ki lai bnai ba la leit, ki jylla ki la pynrung palat 12 lak ngut ki briew ba thymmai, kaba bun tam, bad kaba nang bun shuh shuh ha ka jingpynrung kyrteng. Ka Tnat ka la buh ïa ka thong na ka bynta baroh ki jylla bad ki union territory ban ithuh ïa kiba dei ban ïoh jingmyntoi bad ban pyllait ïa ka jingai ram. Ki Jylla ki la buh thong kylla ïa la ki nongbah, da kaba thmu ban pyndep ïa ki hashuwa ka 31 tarik Nohprah, 2023. Mynta, ka Madhya Pradesh, Assam, bad Gujarat kilong napdeng ki jylla kiba treikam bha, katba ka Ahmedabad, Lucknow, Kanpur, Indore, bad Mumbai ki lamkhmat ïa ki nongbah ha ka jingpyntreikam ia ka prokram. U Myntri u la ïathuh ruh ba, baroh ki jylla ki ïashim bynta shitrhem ha kane ka skhim ban ai jingmyntoi ïa ki briew kiba die jingdie harud surok.
Nalor ka jingai ram ba rit, ka skhim PM SVANidhi ka pynkup bor ïa ki briew kiba die jingdie harud surok lyngba ki jingsiew digital. Ka jingkyntiew ïa ki jingsiew digital, ka jingïashim bynta ki Kynhun ai ram/Bank, bad ki Digital Payment Aggregators (DPA) ka plié lad ban rung ha ki kam digital bad ruh ki jingai jinghikai. Lyngba kine ki jingiatreilang la sakhi ka jingdon palat 113.2 klur ki jingsiew digital ba shongdor T.1,33,003 klur, bad T. 58.2 klur ka pisa ba la ïoh biang ba la pyllait sha kiba dei ïoh jingmyntoi.
U Myntri ka tnad pynroi Sor, u la ong ruh ba ka jingseisoh jong ka skhim ka la long palat ka jingai ram, ka la buh ruh ïa ka nongrim ban don ka jingshngaiñ lyngba ki skhim na ka bynta ka bha ka miat jong ki bahaiing jong ki nongdie jingdie harud surok. Ka sienjam “SVANidhi se Samriddhi” , ba la plie ha ka 4 tarik Kyllalyngkot, 2021, ka thmu ban pynïasoh ïa kiba haiing jong kiba ioh jingmyntoi sha phra tylli ki skhim jong ka sorkar India na ka bynta ka imlang sahlang bad ka ioh ka kot, ban kyntiew ia ka roi ka par kaba kynthup lang ia baroh. Haduh mynta, la mynjur palat 51 lak ka mang pisa hapoh kine ki skhim ban kyntiew ia kiba haiing jong ki nongdie jingdie jingdie harud surok.
Ka jingjop jong ka jingpynkup bor ia 50 lak ki nongdie jingdie harud surok ha ki kam ka ioh ka kot ka dei ka lawei kaba phyrnai jong ki kam ka ioh ka kot jong ka India. Ka Tnat Housing and Urban Affairs ka la kut jingmut ban wanrah ka jingskhem ha ki kam pisa, ka jingithuh bad ki lad na ka bynta ka jingkiew shaphrang jong kine ki bynta ba kongsan jong ka ioh ka kot jong ka India.
Ha kaba ïadei bad kane ka skhim PM SVANidhi, u Myntri u la ïathuh ba ka skhim PM Street Vendor’s AtmaNirbharNidhi (PM SVANidhi, kadei kaba la plie ha ka 1 tarik Jylliew 2020, kadei ka skhim ai ram ïa ki briew kiba die jingdie harud surok ha ki jaka sor kaba thmu ban ai ram ban don bai seng khlem ka jingbuh bynda haduh T. 50,000. Hapoh ka skhim ka don ka jingmyntoi haba ki siew biang por ia ka ram da 7% ka interest subsidy bad ki jingsiew digital ki ioh jingmyntoi da ka jingioh biang ia ka pisa haduh T. 1,200 shi snem. Ka skhim ka pyndonkam ia ka E-KYC katkum ka Aadhaar, ka pyndonkam ïa ka rynsan IT, bad ka pyndonkam ia ki jingai jingtip katkum ka SMS na ka bynta ki jingai jingtip halor ka aplikeshon. Baroh ki kynhun ai ram, kynthup ki NBFC/MFI bad ki DPA, ki la iatreilang da ka jing thmu ban pynduna ia ka jingduk ha ki jaka sor ka India.