Palat 47 lak ïoh jingïarap ki SHG, CLF Wapung Block hapoh ka Lakhpati Didi Initiative & CLF

Khliehriat, Naiwieng 12 : Da ka jingthmu ban pynkhlaiñ shuh shuh ha ka liang ka pisa tyngka ïa ki kynhun Self Help Group (SHG) lyngba ki lad kamai kiba lah ban pynneh pynsah hapoh ka National Rural Livelihood Mission (NRLM), ki kynhun SHG bad ki Cluster Level Federation (CLF) kiba la ithuh kiba hap hapoh Wapung Block ki la ioh pdiang ia ki cheque bad sanction order hapoh jong ka Lakhpati Didi Initiative bad Livelihood Promotion ha ka prokram kaba la long ha Mutong Community Hall, Mutong, East Jaiñtia Hills District.
Haba khein kyllum lang ki cheque kiba kot baroh sha ka T. 4,735,226 hapoh ka Community Funds la ai sha ki nongioh jingmyntoi jong ki SHG bad CLF ha kaba T.43,10,226 kaba dei ka Viability Gap Fund (VGF) bad T.4,25,000 kaba dei ka Community Fund hapoh ka Lakhpati Didi Initiative.
Ha kane ka sngi ïa ki lai tylli ki kali kiba la kot sha ka T. 21,50,000 ba la thied hapoh ka Aajeevika Grameen Express Yojana (AGEY) la pyllait da ki ophisar. Kumjuh ia ka jingai ram lyngba ki bank kaba kot sha ka T. 1,18,00,000 ruh la mang sha ki SHG kiba hap hapoh Wapung Block.
Ha kane ka prokram ba la pynlong da ka District Mission Management Unit (DDMU), EJH la ïa don lang ruh u MLA ka Khliehriat u Bah Kyrmen Shylla ha ka jingiadon lang u Deputy Commissioner ka district u Shivansh Awasthi, IAS, Chief Operating Officer (COO), Livelimo Society (MSRLS) Bah S. Lyngdoh, District Mission Manager (DMM), MSRLS EJH Bah Kevin Slong, ki Khlieh nongsynshar shnong, ki SHG, ki dkhot ka VO&CLF bad ki paidbah ka thaiñ.
Haba aijingkren ha ka prokram u MLA u la ai khublei ïa ka Sanshnong Cluster Level Federation (CLF) kaba la lah ban kynjoh ïa kiba bun ki mawjam bad na ka bynta ka jingtrei shitom jong ki ban pynïaid bad kyrshan ïa ki Self-Help Group (SHG) kiba hap hapoh ka thaiñ San Shnong. U la pynpaw ruh ia ka jingsngewnguh ia ka jingmut thymmai jong ka Pig Hostel kaba pynlah ia kiwei pat ki dkhot jong ki SHG ban iashim bynta lang ha ki kam ri sniang da kaba kyntiew ia ki lad kamai kiba lah ban neh hapoh ka imlang sahlang.
U MLA u la ban jur ruh ba ia kine ki kali ba la ïoh pdiang hapoh ka Aajeevika Express Yojana (AGEY) dei ban pyndonkam hok ban shakri ïa ki jingdonkam jong ki shnong ki thaw, khamtam eh ban kyrshan ïa ki nongrep bad ban pynbha ïa ki lad pynïasoh ha ki thain nongkyndong.
Hadien kane ka prokram, u MLA u la plie paidbah ïa ki kali hapoh ka AGEY, kaba dei ka sienjam kaba thmu ban pynïoh ïa ka jingshakri ha ka kit ka bah kaba shngaiñ ka kot bor bad ka ban shakri ia ki paidbah ha ki shnong kiba jngai bad ruh ban pynmih kamai na ka bynta ki dkhot jong ka SHG kiba pynïaid ïa ki kali paidbah.
Hadien u MLA ha ryngkat u DC ka District, COO) Livelihood Promotion (LP), MSRLS, Bah S. Lynghala DM, District Mission Manager ( (MSRLS), EJH, u Bah Kevin Slong bad ki khlieh nongsynshar shnong ki la plie paidbah ïa kawei ka Pig Hostel ha ka shnong Cham Cham ha kaba ïa ka jingtei la bei pisa lyngba ka DMF, EJHD ryngkat ka jingïatreilang bad ka DDMU, MSRLS,EJHD bad ka ophis jong ka Wapung Block.