Mawkyrwat, Naiwieng 19 : Ka Rural Social Outreach ne RSO kawei na ki kynhun jong ka Balang Presbyterian jong ka Shella Presbytery kaba dei kawei ka shnat treikam hapoh ka jingpeit ne pynïaid jong ka Social Economic Life Development (SELD) jong ka Shella Presbytery ka la pynlong ïa ka Free Medical Camp ne ban ai ka jingsumar bad ai dawai ei ïa ki paidbah ha Langsya Presbytery Upper Primary School, Langsya, Syntein kaba hapoh jong ka Mawsynram C&RD Block, East Khasi Hills District.
U T.Bn. G. Stone Hynñiewta uba dei u Secretary jong ka Rural Social Outreach ne RSO u la ong ba ka jingthmu jong kane ka kynhun ka long ban ai ki jingshakri sha ki paidbah ha kiba bun ki bynta ym tang ha ki kam jong ka jingshakri ïa U Blei hynrei kaba kongsan tam ban pynsngewthuh ha ki briew ïa ki jingkordor jong ka jingkoid jingkhiah ha ka imlang sahlang ha ryngkat ka jingïatrei lang bad ka tnad ka koid ka khiah napoh jong ka District Medical & Health Officer, Mawsynram namar ka jingkoid jingkhiah ka long kaba kordor tam ha ka jingim ki briew bad lada ngi don ïa ki jingpang jingshitom ka pyndkoh lut ïa ka spah ka phew bad ïa baroh ha ka jingim jong ngi ki briew.
Ym tang kata, la ïathuh ruh ba ha kane ka jingsumar bad ai dawai ei ki la don haduh 400 tam ki paidbah kiba la ïoh jingïarap bad jingsumar ei kiba kynthup naduh ki khyllung khynnah, ki ki tymmen shynrang bad kynthei.
Kiba la ïadon lang ha kane ka sngi bad kiba la ai ki jingkren lyngkot ki long u Dr. R. Suchiang, Medical & Health Officer jong ka CHC Mawsynram, u Rev. P. Hynñiewta ha ryngkat da ka jingïadon lang u T.Bn. B.L. Nonglait bad ïa ka jingduwai kyrkhu pynwai la ïoh na u Rev. Balajied Ramsiej uba dei u Missionary ba trei sha Ri Nepal ha ryngkat ka jingsakhi lang kiwei de ki Pastor, ki Tymmen Basan bad ki ‘riew rangbah ka thaiñ.
