Shillong, Ïaiong 10:Ka Bharat Sanchar Nigam Limited (BSNL) kan sa pynieng ïa palat 350 tylli ki mobile tower ba thymmai ha kylleng ki jaka jong ka Jylla Meghalaya ban pynthikna ba ki nongshongshnong na baroh ki kyndong kynshrot kin ïoh pyndonkam ïa ki kor mobile bad ki Internet.
Katba u Myntri Rangbah ka Jylla Conrad Kongkal Sangma u dang kwah ban pynkhlaiñ ïa ki lad pyniasoh, ki sien jam mynta kila ïaid shakhmat ha ka ban pyniasoh da ki kor mobile.
Ka Jylla Meghalaya ka don 6839 tylli ki shnong, ha kaba haduh 1164 ki shnong kim pat ïoh satia ïa ki mobile network. Don ki khep ba ki briew na ki shnong ba sha kyndong bad khappud ki hap shaniah ïa ki mobile network ha Bangladesh.
I Chief Secretary ka Jylla Kong Rebecca Suchiang dang shen ila shong bishar kam haba ïadei bad ka jingpyntrei kam ïa ka Universal Service Obligation Fund (USOF) scheme ba thmu ban pynïoh internet sha ki 1164 tylli ki shnong kyndong bad ki bym pat ïoh network mobile.
La bhah ïa ka song pisa ba kot haduh T. 726.65 klur ban pynjanai ïa ki mobile network hapoh ka USOF.
Ka BSNL kala mynjur ban pynieng haduh 352 tylli ki mobile tower ha kine ki 1164 tylli ki shnong kyndong ki bym pat ïoh mobile network hapoh ka Jylla.
Nalor kine ki mobile tower ba thymmai haki shnong kyndong, ka BSNL kala mynjur ban pynieng sa hynriew tylli ki mobile tower ha surok bah NH 42 bad NH 51.
Kumjuh ruh ki kompani shimet ba kynthup ïa ka Airtel kila sdang ban pynieng ïa ki mobile tower thymmai ban pynkhlaiñ ïa ki lad iasoh ha ki shnong kyndong jong ka Jylla Meghalaya.
