Palat 26 hajar ngut yn tuid ki paid ieid jingrwai sha ka concert u Ed Sheeran

Shillong, Rymphang 10 : Khnang ba ka jingwan jong ki paidbah sha ka concert jong u Ed Sheeran ha ka 12tarik mynta u bnai ha madan JN Stadium kan long kaba ïaid beit, na ka liang ki bor District ka East Khasi Hills ryngkat bad ka tnad Tourism ki la pynmih katto katne ki jingpynbna paidbah.
Haba kren bad ki lad pathai khubor ha ka sngi Nyngkong, ka Deputy Commissioner ka East Khasi Hills, Kong RM Kurbah ka la pyntip ba antad kin poi haduh kumba 26000 ngut ki paid ieid jingrwai kiban wan na kylleng sha katei ka tamasa kaban long ha kane ka sngi Balang.
Kumta, ka la pyntip ba ïa ka khyrdop kin sdang plie naduh ka por 4:00 baje janmiet khnang ba ki paidbah kin lah ban rung lypa kham kloi bad kawei ruh namarba ki don tang ar tylli ki jaka rung.
“Dei na kane ka daw ba ngi kwah ban kyntu ïa ki paidbah kiba wan sha kane ka concert ba kin wan noh dang kham kloi khnang ba kan ym don kano kano ka jingïaknieh rung ne ka jing ïa thyngian,” ka la ong.
Ha kajuh ka por ka la pyntip pat ba kin don haduh lai tylli ki jaka mih.
Ka DC ka la pyntip ruh ba yn ym shah satia ïa ki khynnah ba hapoh san snem ba kin rung shapoh ka concert. Nangta ka ong ruh ba ki tiar ba ki paidbah ki lah ban rah shapoh kin dei beit tang ki mobile phone, ki shabi kali ne scooty bad ruh ka pla pisa.
Halor ka jingkylli, ka DC ka ong ruh ba ki bor distrik kim don jingthmu ei ei ban khang ïa ki skul ha katei ka sngi ba don concert.
Haba ïadei pat bad ka jingpynbeit kali, u heh pulit ka distrik, Bah Vivek Syiem u la pyntip ba kin don bun tylli bha ki no entry point lane ki jaka ba yn ym shah rung kali.
Katkum ka jingïathuh jong u, kine ki No Entry ki kynthup na lad Lumjingshai ter ter sha lad CRPF, Polo, nangta na Lumjingshai sha ki bynta jong ka Police Colony, na lad Lawmali sha Polo bad na lai lad Golflink sha Polo.
Nangta na ka lad City Hut Dhaba sha Polo, na ophis BJP ter ter sha Oakland, Polo. Na BK Bajorïa shaduh Fourth Furlong, , Gurudwara sha ki bynta jong ka St Anthony’s college.
Haba ïadei bad ka jaka pynieng kali, u SP u la ong ba ki don bun tylli bha ki jaka ba ki paidbah ki lah ban pynieng ia ki kali jong ki. Kine ki kynthup ïa ka Red Field, Golflinks, nangta ban pynieng ha rud surok naduh TRS Restaurant sha ophis CM Connect, rud surok sawdong ka Golflink, ka lad FCI shaduh lad Lumjingshai, state central library campus bad ka state convention campus.”
Haba ïadei pat bad ki bor pahara, u SP u la ïathuh ba kin don lai jaka ki jaka talasi ha shwa ba ki paidbah kin rung sha stadium. U ong ruh ba ki pulit kin ïatrei lang bad ki bor pahara ba la pynkhreh na bynta katei ka tamasa.
Katkum ka jingïathuh da ki bor pynïaid, ka prokram ha kane ka sngi kan sdang naduh ka por 6:15 baje janmiet ha ka 12tarik.