Palat 250 ngut ki nongïashimbynta ha ka Inter College Arm Wrestling Championship 2023 jong ka BAM

Shillong, Naitung 23: Kum shibynta ban sei madan ïa ki samla kiba Bouncer Association of Meghalaya ryngkat bad ka jingïatreilang bad ka Shillong College ka la ïoh ban pynlong ïa ka rynsan ïakhun kti ïa kaba la tip da ka Inter College Arm Wrestling Championship ha ka Sngi Saitjaiñ jong ka taïew ba ladep ha Shillong College kaba la sdang naduh ka por 9 baje mynstep, bad ki la don palat 250 ngut ki nongïashimbynta kynthei bad shynrang.
Ha ka jingplie pyrda ïa kane ka Championship i kongsan i dei i Dr. E. Kharkongor – Principal jong ka Shillong College, nangta i Bah Andrew A. Jyrwa – i ba dei i Rangbah Shnong jong ka Laitumkhrah bad i P. S. Nongkynrih.
Katba ha ka jingkhylliap pyrda, i Bah John Kharshiing – President, MSOA bad ruh Vice-President jong ka National Rifle Federation of India i la long kum i kongsan ryngkat bad i Fantin Joseph Lakadong – MDC jong ka 17 Malki-Laitumkhrah Constituency, Mawthoh – DSO, East Khasi Hills, Larina Nongpyiur – Representative, Meghalaya AIDS Control Society. Ha kane ka sngi ki la don ruh katto katne kiba la shah khot sngewbah (Special Invitees) kiba kynthup ïa i Kong Pristimai Jyrwa Nongsiej – Proprietor, JN Suzuki Mawblei (two wheeler dealer), Arwin Rumnong – Proprietor, Synergy Gym, Samkhamti Diengdoh, Entrepreneur, Osmand Nongbri – MD, Meghalaya Cooperative Apex Bank.
Nalor kane ka Championship la ïoh ruh ban pynlong ïa ka prokram ai jinghikai lane ka Awareness Programe ha kaba ïadei bad ka jingnang kiew ka jingpang HIV AIDS/ bad ruh ka jingkyrni jong ki khynnah ha u Drok lyngba ka tnat Meghalaya AIDS Control Society bad ruh na ka Social welfare Department.
Haba phai sha ka jingïakhun kti, ki nongpynïaid ki la ïoh ban bynta ïa ki nongïalehkai ha ki kyrdan bapher bapher da kaba thew kilo, ïa baroh ar kynthei bad shynrang.
Ha ka kyrdan ïakhun jong ka 55 kg below jong ki shynrang, ïa ka kyrdan ba nyngkong la jop da u Shemladbha Khongwir (Seng Khasi College), wan ba ar u Benison Marweiñ (Govt. Boys Higher Secondary School) bud sa u Shanbhalang Rynjah (St Anthony’s College) ha ka kyrdan ba lai.
Ha ka thup jong ka 65 kg below jong ki shynrang, la jop da u Imonmi Suchiang (Synod College), kyrdan ba ar da u Reily M Kharsyntiew (Shillong College) bad u Damewan Kharjana (Synod College).
Ha ka kyrdan 75 kg below la jop da u Andy L Mylliem Umlong (Institute Software and Technology), ba ar u Tolammame Mylliem Pdah (Shillong College), nangta u Bamang Tajik (St Dominic Nongthymmai).
Ha ka thup kyrdan 75 kg shajrong (above) ïa ka kyrdan ba nyngkong la jop da u Heiwamut Laloo (Kiangnongbah College), Saka Korelhei (K.L. Bajoria College) nangta u Dasien Miki ñiangti (Shillong College).
Haba phai pat sha ka thup ïakhun jong ki kynthei, ha ka kyrdan 50 kg below, la jop da ka Pynsuklang Lyngdoh (Seng Khasi College), ba ar i Da-i-hunshisha Mawlong (Seng Khasi College) nangta u Alberis Sten (Women’s College).
Ha ka kyrdan 55 kg below pat la jop da i Parkles T, Lyngkhei (NEHU), bud sa i Daphinia Kurkalang kyrdan ba ar (St. Mary’s College) bud sa i Jasmine Synrem (St. Mary’s College).
Katba ha ka kyrdan 60 kg below ka Rituka Sarki (B.B.S. Collge) ka la wan ha ka kyrdan ba nyngkong, wan ba ar ka Bahunshisha Marwein (Seng Khasi College) bad wan ba lai da i Dakarabha Dkhar (Shillong College).
ïa ka kyrdan 60 kg above la jop da ka Yirmi Jagoi (Women’s College), wan ba ar i Durka Padit (Shillong College) bad kyrdan ba lai da i Phidalin Mary Pathaw (St Anthony’s H.S. School).
Haba phai sha ka jingïakhun hapdeng ki lahduh jong ki kyrdan bapher bapher lane kata ka Champion of Champion (COC), napdeng ki kynthei la jop da ka Yirmi Jagoi jong ka Women’s College katba na ki shynrang la jop da u Shemladbha Khongwir jong ka Seng Khasi College.
Katba na ka liang jong u Maïanbok Marweiñ u la ïoh pdiang ïa ka khusnam kaba kyrpang (Special Prize) kum u Best Athlete ha kane ka Championship.
Ki nongjop na kane ka rynsan ïakhunkti jong ka Inter College kin sa ïoh biang ban ïashimbynta sa ha ka Shillong Arm Fight-All India Championship 2023 ka ban sa long shen.