Nongstoiñ, Nailar, 08: Ka kynhun jong ka West Khasi Hills District Village Employment Council Association (WKHDVECA), ha ka jingïalam u Bah R.G Momin MLA 33 Rambrai Jyrngam Assembly bad u Bah Lurshai Kharbani MDC KHADC, ka la leit ban ïakynduh ïa u Bah A.T Mondal myntri jong ka Community & Rural Development Government of Meghalaya Shillong ha ophis treikam ka jong u ha secretariat halor ki mat ki jura jong ka jingïakynduh jingeh jong ki shnong, ha kaba ïa dei bad ka jingpyntreikam ïa ka Scheme MGNREGA lane ka jingtrei 100 sngi.
Ha ka jingleit ïakynduh ha ka 7 tarik mynta u bnai, ki nongïalam ki la pynpaw ïa ki mat ba kongsan kum ka jingeh jong ki Vendor, ki nongkitkam jong ka VEC halor ka jingpynslem ïa ka ban siew ïa ka bai material bill, kaba la sah kut da ki snem, kaba la pyntlot ban treikam bad haduh ba ki vendor kim lah shuh ban kyrshan na ka daw jong ka jingdap ram ha ki dukan ka bai thied tiar kum ki maw ki shyiap bad kiwei kiwei. Kane ka la wanrah ïa ka jingeh ba khraw ban pyndep ïa ki project jong ki jingtrei bapher bapher hapoh ki shnong.
Haba kheiñ lang ïa ka jingsahkut jong ka pisa ba tang hapoh jong ka West Khasi Hills District kaba don ïa 5 tylli ki block office, kynthup lang ïa ki Block office kiba dang thymmai, ka la poi sha palat 23 klur tam haduh mynta.
Kane ka la wanrah jingeh bad ka la pynartatien ruh haduh lano kane ka sorkar kan lah ban siew ïa katei ka pisa ba dang sah sha ki vendor. Haba ïa kren bad u myntri ba dei khmih, u la pyntip ba na ka liang ka sorkar, kam shym la pynslem ban phah ïa ka pisa sha ki district bad ruh kumjuh sha ki block office, hynrei ka dei na ka daw jong ka jingphah slem na ka Central Government.
La ïoh ruh ban ïa kren ha kaba ïa dei bad ka jingeh jong ki nongbat ïa ka kam, ba kin hap ban shon dur ar sien shi sngi ban lah ban upload ïa ka attendance lane ba yn lah ban ban siew bai bylla.
La ïa kren sani bha ba kum ki VEC ki la mad jingeh shibun eh na ka daw ba kim don ki mobile kiba biang, ka jingbym don network ha ki katto katne ki jaka trei, ka jingbym biang ka Apps NMMS Application, khamtam ba kane ka la shu pynbunkam shibun eh na ka bynta ki nongpeit kum ki Mate bad Secretary 100 sngi.
Ka kynhun ka la ïoh ban ïa kren ruh ha kaba ïa dei bad ka bai bylla sngi kaba long tang 272 tyngka shi sngi shi khlieh kynthei bad shynrang kaba long ka jingsiew bai bylla kaba rit bha.
Ka Association ka la buh ka jingkyrpad sha ka sorkar ba kan pynkiew noh ïa ka bai bylla kaba dei katkum ka por bad ruh ban pynïahap katkum ka bai bylla ba la buh ka ka sorkar jylla, namar ba kam ïahap shuh katkum ka dor bad ka por naba ka jingrem jong ki mar ki mata bad ki jongdonkam ha baroh ki liang.
Ka Association ka la kyrpad ruh sha u myntri ba kin kham ai lad ban nym buh pyrkhing eh ïa ki jingtrei ba ki paidbah ki donkam ha ki shnong, namar ba ki la bun palat ki jingteh kyndon (Permissible Work) ba kin lah ban trei ïa shibun ki jingdonkam ha ki shnong kum ka kynroh bad fencing bad kiwei kiwei de.
La ïoh ban pynsngew ruh sha u myntri ha kaba ïadei bad ka jingmang pisa ha ki jingtrei (Estimate) ba na ka liang ka scheme MGNREGA ka long kaba rit shaba palat, haba ïa nujor bad kiwei ki department ban mang ban pynlut bad ban kynthup lang rung ïa ka bai repair khnang ba ki jingtrei kin long kiba bit ba biang bha.
Halor kitei ki mat ba Association ka la ïoh ban ïakren, na ka liang u Bah JTS Thongni, u Nongïalam u la pyntip ba u myntri u la pynpaw ba um shym la shongthait ban wat ki lad ki lynti, ban peit ïa ka jingbha jong ki paidbah.
U la pynpaw ruh ba ka Scheme MGNREGA ka long ka budlum ban ïarap ïa shibun ki shnong ban pynïoh ïa ki jingdonkam. U myntri u la pynpaw ruh ba ki briew ha ka constituency jong u bad ha baroh kawei ka State hi, ki mad ïa kane ka jingeh, na ka daw ba ka sorkar pdeng ka buh ïa kine ki rukom pyntreikam jong baroh ki scheme MGNREGA bad ba ka sorkar jylla kam da lah than ban tuklar halor kine ki jingpyntreikam.
