Palat 2000 tylli ki skul maramot ka Sorkar MDA, kynnoh bym leh eiei ki Sorkar barim

Shillong, Nailur 29 : Ka sorkar jylla ha ka sngi Palei ka la kam ba ki la hap ban maramot haduh kumba 2000 tylli ki skul sorkar kiba don ha ka jylla kynthup naduh kiba la jot rathai haduh kito ki skul kiba jot malu mala.
Ki don haduh kumba 2000 tylli ki skul kiba hap ban maramot bad kumta haba ngi shimti nyngkong ngi la sah lyngoh hynrei ngi la rai ba dei ban sdang beit khyndiat khyndiat ban leh ei ei namar ngi don ka jingthrang ban trei,” ong u Myntri Rangbah, Conrad K Sangma ha ka jingïalang plie paidbah ïa ki 50 tylli ki skul kiba la dep ban maramot thymmai lut ha kylleng ki bynta jong ka jylla.
Haba kren kum u Kongsan ha ka jingïalang kaba long ha Yojana Bhavan ha ryngkat ka jingdonlang u Myntri ka tnad Pule Puthi ka sorkar Jylla, Bah Lahkmen Rymbui kumjuh u Chief Secretary Bah DP Wahlang, u Myntri Rangbah u la ong ruh ba na ki 2000 tam ki skul haduh kumba 800 tylli ki dei kiba la kham jur ka jinglut ban maramot katba ki don kumba 600 – 800 tylli pat kiba donkam ban maramot katto katte bad kiba sah nangta ki dei kiba kham duna ka jinglut.
“Ngi don ha lynti ban pyndep 100 persen ka jingpynthymmai lut ïa ki ïing skul watla kam dei da ka jingtei kaba thymmai hynrei ngi la sdang,”u la ong da kaba bynrap ruh ba ki buh thong ha ba u bnai ban wan kin plie biang sa kumba 50 tylli nangta ha utai uwei u bnai ruh sa 50tylli. Nalorkata u ïathuh ruh ba ki buh ka thong ba ha ki 100 sngi ban wan kin lah ban pyndep ïa ki 1500 tylli ki ïing skul kiba dang sah.
Haba bynrap lang, u Bah Lahkmen u la ong ka daw kaba pynlong ïa kane ka sorkar ban maramot palat hajar tylli ki skul kadei namar baroh shi katta kiwei ki sorkar ki la kheiñsting ïa katei ka bynta.
Katkum ka jingong jong u, ki don ki jaka ba don ki skul kiba bha katba ki nonghikai ki duna, don pat ki skul ba biang ka jingdon ki khynnah bad nonghikai hynrei ka ïing skul pat kam long.
“Hanga hi, ngam da khuslai than ïa kata ka kyrdan namar kadei tang ka thong hynrei kaba nga thrang hi ka long ban kyntiew ïa ka jingdonkam jong ki. Kane ka prokam ba ngi pynlong mynta ruh ka pyni ba kam dei satia ba ngi shu kren hynrei ngi pyni ruh da ki kam,” u la ong.
U Myntri u la kyntu ruh ïa ki Managing Committe ba kin shimlang ïa ka jingkitkhlieh ban peit ïa kitei ki skul kiba don ha kylleng ki bynta jong ka jylla. “Ngi kyntu ïa ki Managing Committee ba kin shim ïa ki jingwan skul ki nonghikai ruh,” bynrap biang u Myntri.
Shwa kane, u Chief Secretary ka jylla u la ïathuh ba na ki 2634 tylli ki skul sorkar kiba don ha ka jylla, kane ka sorkar mynta kan maramot haduh 2016 tylli ki skul.
Katkum ka jingong jong u, ha kiba bun ki khep don ki skul kiba tang shu slap la hap ban ai shuti namar ba la jot lut bad pei lut. “Hynrei sngewkmen ba mynta ki khynnah skul ki la don ha ki kti kiba shngaiñ,” u la ong.
Ryngkat ka jingdonlang ki khynnah skul bad ki heh sorkar ha katei ka jingïalang, u Myntri Rangbah u la shim ruh ka jingsmai NIPUN Bharat Mission.