Shillong, Naiwieng 23 : Ki la don haduh palat 2000 ngut ki nos na ka jylla kiba don mynta ha ka jingpynkhreh ban leit trei sha kylleng ki ri ka pyrthei.
Ïa kane la pyntip da u Myntri Rangbah ka Jylla Conrad K Sangma haba kren ha ka jingplie ïa ka CFI (Caring for India) Centre kaba dang shu dep shna thymmai ha Nonglum, Umroi, Ri-Bhoi ha ka sngi Saitjaiñ.
Haba pynpaw shuh shuh ïa ka jingkiew jong ka jylla ha kaba pynsuk ïa ki lad kamai na ka bynta ki nos, u Myntri Rangbah u la ong, “Ha u snem ba la dep, 37 ngut ki nos ki la leit trei sha Japan, kumba 30 ngut sha Singapore, bad ka kynhun ba nyngkong kan leit sha Germany shen mynta.”
U la bynrap ba watla kine ki lad ki la don kham mynshuwa, hynrei u ong pat ba kam don satia ka jingïadei ne ka jingplie lad ïa ki samla kiba kwah ban leit trei shabar.
Shuh shuh u la pynshai ruh ba ka jingtuklar jong ka sorkar lyngba ki job fair, nangta ka jinghikai ïa ki jait ktien bapher bapher bad kiwei kiwei ka long ka jingkyrshan kaba khraw ïa ki longiing kiba donkam hok.
U Myntri Rangbah u la pyntip ruh ba kine ki nos kiba leit trei mynta shabar ki ju phah la kumno kumno kumba 1 lak tyngka ka tulop sha la iing, kaba la kot kumba 4.8 klur tyngka shisnem na ka bynta ki 40 ngut ki nos.
La batai ruh ba ka CFI Centre kan long kum ka jaka kaban pynkup bor ïa ki nongïalam ban trei ha ka imlang sahlang bad ruh ha ki kam bapher bapher kiban pynmyntoi ïa ka imlang sahlang.
Kane ka sienjam ka long ruh ban pynkupbor ïa kito kiba shah hikai, ban pynkhlain ïa ka jingngeit bad wanrah shuh shuh ka jingïatrei lang kaba jan kaban noh synniang pat na ka bynta ban kyntiew ïa ka imlang sahlang ha ka thain baroh kawei.
Ha kajuh ka por u Myntri Rangbah u la ai ka jingïaroh ïa ki riew rangbah kiba la ïohi jngai na ka bynta ban buh ïa ka CFI na ka bynta ka jingmyntoi ka thain.
Ha kane ka sngi la ïoh ruh ïa ka jingkren na u MLA ka Umroi, Bah Damanbait Lamare bad kiwei kiwei.
