Palat 200 ngut ki samla pule kiba thep kyrteng ban ïoh pule Doktor ha PA Sangma Medical College

Shillong, Risaw 29 : Palat 200 ngut ki samla pule ki la thep kyrteng ban ïoh pule Doktor ha ka PA Sangma International Medical College & Hospital (PASIMCH) jongka University of Science and Technology, Meghalaya (USTM) kaba dei ka Private Medical College ba nyngkong eh ha ka jylla.
Haba ïakren bad ki nongthoh khubor mynta ka sngi ka Myntri ka tnad ka Koit Ka Khiah ka Dr Ampareen Lyngdoh ka la ïathuh “ Kat haduh mynta ki la don palat 200 ngut ki samla pule kiba la thep kyrteng ban ïoh pule doktor ha ka PASIMCH. Na ki 150 tylli ki seat, 23 tylli ki dei na ka bynta ki NRI, 64 tylli na ka bynta ka jylla Meghalaya bad 63 tylli jongka USTM.
Haba kylli halor ka jingud jong kiba bun ba ka bai pule ka la rem palat kaba long haduh 4,95000 tyngka shisnem kaba mut naduh ba sdang pule haduh ban da dep kan kot sha ka 24,75,000 lak tyngka, ka Dr Ampareen ka la ong ïa kane ka bai pule la ïa mynjur lang hapdeng ka sorkar bad ka USTM ha ka jingïakynduh ba dang shen. “ ïa kane ka bai pule la ïa mynjur lang ha ka jingïalang ba dang shen hadpeng ki bor sorkar bad ki bor pynïaid ka USTM. Kumta namar ba ka dei ka private medical college la shah ban shim bai pule kumne tangba ha ka hap hapoh ka jingpeit jingkhmih jongka National Medical Council (NMC) bad dei ruh ka jingmynjur lang jongka halor kane ka bai pule.
“Kumta ban ong ba ka dor ka la rem palat kam long kaba shisha. Namar u Myntri Rangbah ruh u la ïoh jingtip shai halor kane tangba wat la katta ruh ynda u la kham kylluid por un sa shong bishar bniah biang sa shisien ïoh lehse dang lah ban plie lad ban ïarap ïaki samla pule kiba pule ha kane ka medical college” ong ka Dr Ampareem.
Ka Myntri la ïathuh ruh ba ka dor jongka bai pule ka ïapher na kawei ka jylla sha kawei pat. Hynrei wat la katta ruh ka don sa ka scholarship ka ban ïarap ïa kine ki jingsiew. Hooid ki samla pule ruh ki hap ban siew tangba kaba bun ka pisa la siew bad bei da ka sorkar jylla. Ai ba u myntri rangbah un bishar bniah halor kane namar u ruh u la ïoh jingtip kaba bniah khamtam ha kaba ïadei ba ka pisa tyngka.
Ka myntri ka la ïathuh ruh ba ka jingjied ïa ki samla pule ban ïoh pule ha kane ka medical college kan long kat kum ka NEET bad kumjuh ruh kat kum ka Reservation Policy.
ïa mynta ka USTM ka tyrwa 46 seat ïa ka jylla Meghalaya bad na ka liang ka sorkar ka la pynkhreh nadong shadong na ka bynta ki samla pule. Na kitei, 25 ngut yn bei tyngka nadong shadong da ka sorkar katba kiba sah pat kin hap ban siew shiteng na ka bai pule ba la buh da ka sorkar bad ka USTM.
La ïathuh shuh shuh ba ka Ordinance ba la mynjur da ka Kynhun Myntri dang shen ban sdang noh ïa kane ka Medical College ka dang sahkut bad u Lat ka jylla.
Kiba bun ki samla pule ki kwah ban ïoh pule ha kane ka Medical College kumta ka sorkar kan hap ban ïaid kat kum ki kyndon bad ki aiñ ym lah ban ïaid lyndet ïa ki aiñ. Hooid la hap ban leh kyrkieh ïa kane ka kam namar hap ban bud ïa ki kyndon ba la buh da ka NMC namar ka don wat ka jingbuh por ban sdang ïa ki class ruh. Kumta ngi shu ap ïa ka jingsoi mynjur u Lat ïa ka Ordinance bad hap ban pyndep ïakiei kiei baroh nadong shadong hapoh ka por ba la buh.