Shillong, Lber, 29: Ka tnat Central Reserve Police Force (CRPF) ka la khot bad wer ïa ki samla Khasi ba kin shim kabu ban rungkam hapoh kane ka tnat ha kaba ki don palat 20 hajar tylli ki kam kiba lait khnang ban weng ïa ka jingkyrduhkam jong ki samla pule kiba la biang ka kyrdan jingnang jingstad.
Dang shen ka tnat CRPF ka la ai ïa ka jingpyn sngewthuh ha ka shnong Mawprem, Shillong khnang ba ki samla kin dup tip kumno ban rung kam hapoh ka tnat CRPF.
U Commandant jong ka tnat CRPF 67 Bn, Polo Hills Head Quarter u Alok Bhattacharya u la khot bad wer ïa ki samla Khasi ba ki dei ban mih shakhmat ban ïada ïa la ka ri bad ban long ruh ki nongpeitngor ïa ka shongsuk shongsaiñ ha ka ri da kaba rungkam hapoh kane ka tnat.
Ha kane ka jingpynsngewthuh sha ki samla, la sakhi lang da u President ka BJP Meghalaya State Unit u Bah Ernest Mawrie, ki samla bad ki nongkitkam jong ka Dorbar Shnong Mawprem.
Ha ka jingïakren bad u Nongthoh Khubor, u Alok Bhattacharya ula ong, “kane ka dei ka sienjam kaba nyngkong eh ïa ka tnad Pulit CRPF ban pynlong ïa kine ki jingpynsngewthuh ha kane ka jylla Meghalaya bad kane kan wanrah ïa ka jingïadei kaba jan bad ki paidbah nongshong shnong.”
U la khot bad wer da ka jingsngewrit ïa ki samla wadkam jong kane ka jylla Meghalaya ba ki dei ban wan shakhmat ban thep ïa ki kam kiba lait hapoh ka tnat Pulit CRPF.
“Ka Ministry of Home Affairs ka la buh kyrpang ïa kano kano ka Jylla ban pynrung kam ïa ki trài muluk ïa kaba la pynjynsur ïa ki kyndon aplai kam katkum ka jingdonkam la ka long ha ka rynieng ryniot ,” ïathuh u Alok Bhattacharya.
“Mynta kam long shuh kum ha ki por kiba mynshwa ba ka jylla ka Jylla Meghalaya ka donkam da ki briew lajong bad ka tnad Pulit CRPF ka thrang hir hir ban ïoh da ki samla na kane ka Jylla Meghalaya,” ula ong.
Une u Heh ophisar jong ka tnat Pulit CRPF u la ong ruh ba ka tnat kan sa leit sha baroh ki District jong ka jylla Meghalaya ban pynsngewthuh bad ban ai jinghikai sha ki samla kumno ban ïohrung kam hapoh ka tnat Pulit CRPF khnang ban weng ïa ka jingkyrduhkam hapoh kane ka jylla.
Na ka liang jong u Bah Ernest Mawrie u la pynpaw ka jingsngewthuh ïa kane ka tnat Pulit CRPF kaba la ai ïa ka jingïatreilang bad ki Dorbar Shnong bad ki paidbah nongshong shnong na ka bynta ban peit ïa ka shongsuk shongsaiñ ha ki shnong ki thaw bad ban plie lad ïa ki samla kiba angnud ban rungkam ha ka tnat Pulit CRPF.
