Shillong, Risaw 01 : Ka jingdawa ban ithuh noh ïa ka Ktien Khasi ha ka Khyrnit kaba Phra kam dei shuh kaba thymmai hynrei kadei kaba la ïaid la slem bha hapoh ka jingïalam jong ka Khasi Author’s Society (KAS), ong u nongïalam ka National People’s Party (NPP) na Meghalaya ba dei ruh u Myntri barim ka sorkar jylla, Bah Hamlet Dohling.
Ïa kane utei u rangbah u la kren hadien ka jingïalang paidbah ha Jantar Mantar, Delhi ban dawa na ka sorkar pdeng ba kan ai jingithuh noh kham kloi ïa ka Ktien Khasi ha ka Khyrnit kaba Phra.
“Kane kadei ka jingdawa kaba kongsan tam na bynta ki paidbah ka Meghalaya namar ïa kane ka Ktien Khasi la kren da palat 16 lak ngut ki nongshong shnong ka Meghalaya. Kumta ka jingdawa kadei kaba shong nongrim bad shongnia ïa ka sorkar pdeng ba kan pynurlong noh,” la bynrap shuh shuh u Bah Hamlet.
Haba jubab ïa ka jingkylli, u la ong ruh ba kaba ki khmih lynti mynta ka long ba ka sorkar pdeng kan ym sngap mynthi sah hynrei ba kan ai noh ïa ka jubab kaba shai kaban pynhun ïa ki nongshong shnong ka Meghalaya.
“Lada don ne ym don elekshon ruh hynrei kane kadei ka jingdawa kaba shongnia kumta ngi phah ïa kane ka khubor sha u Myntri Rangbahduh ka Ri, u Narendra Modi ban sngap lem ïa ka jingkyrpad jong ki nong Meghalaya,” la bynrap biang u Bah Hamlet.
Kumban shu kdew hangne, bun bha ki nongshong shnong ka Meghalaya kynthup ïa kito kiba sah ha Delhi kiba leit ban shim bynta ha ka jingïalang ha Jantar Mantar ha kane ka sngi Saitjain ba la dep ban pynsngew sha ka sorkar India ba kan pynstet ithuh noh ïa ka Ktien Khasi ha ka Khyrnit kaba Phra.
