Palat 1500 klur ki projek yn buh mawnongrim ka Finance Minister ha ki saw sngi ba don ha Shillong

Shillong, Naitung 10 : Ka Myntri ba bat ïa ka Platyngka jong ka Sorkar Pdeng, ka Nirmala Sitharaman ha jingwan jongka sha Shillong na ka bynta saw sngi kan sa plie bun tylli ki projek kam pynroi ha kylleng ki bynta jong ka jylla kiba kot palat ïa ka 1500 klur.

  Mar ïa poi ha nongbah Shillong ha ka sngi Palei, ka Myntri ka la plie shwa ïa ka Polo Shopping Complex kaba la dei itynnad bha ha ka jinglut kaba kot sha ka 100 klur tyngka lyngba ka Smart City Mission. Ha kane ka jingïalang plie la donlang ruh naduh u Myntri Rangbah ka Jylla, Conrad K Sangma, nangta u Symbud Myntri Rangbah Bah Sniawbhalang Dhar, Myntri ka Koir ka Khiah Dr. Ampareen Lyngdoh nalor u Chief Secretary ka Jylla bad kiwei kiwei.

  Ha kine ki sngi ban wan, ka Myntri kan buh mawnongrim ruh na ka bynta ban pynwandur thymmai ïa ka Pung Umïam sha ka jaka jngohkai pyrthei kaba kham itynnad shuh shuh kaba la mang ha ka jinglut kaba kot sha ka 99.99 klur tyngka.

Kawei pat ka projek ka dei ka MICE and Cultural Infrastructure Hub ha Mawkhanu,  kaba dei ka  flagship project ban kyntiew shuh shuh ïa ka Meghalaya  kum ka business tourism kaba la mang  ban tei ha ka jinglut kaba 99.99 klur tyngka.

Nalorkine, ka Myntri kan sa buh mawnongrim ruh na ka bynta ban tei ïa ka Mawkhanu Football Stadium kaban kylla long ka stadium kaba heh tam ha ka Ri kaban ngiam haduh 40,000 ngut bad kan long ruh kawei na ki state-of-the-art academy kaba la mang ban tei ha ka jinglut kaba 732 klur tyngka.

Nalorkine, kan buh mawnongrim na ka bynta ban shna ïa ki Working Women’s Hostel ha Shillong, Jowai bad Byrnihat bad kumjuh ha Tura na ka bynta ban kyrshan ïa ki longkmie kiba tynrong lang ïa ka lyngkor ban trei, ha ka jingmang kaba kot sha ka 132 klur tyngka.

Nangta kan plie (online) ïa ki 75 tylli ki Digital Libraries ha ki nongkyndong da ka thong ban pynjan ïa ka rukom treikam digital na ka bynta ki samla nongkyndong, ïa kaba la mang ha ka jinglut kaba 162 klur tyngka.

Ha ryngkat ka jingdonlang u Myntri Rangbah ka Jylla, ka Myntri kan sa plie paidbah ruh ïa ka “Meghalaya Film Tourism Policy, 2025”,  kaban pynphalang ïa ka jingnang kiew ka jylla kum kawei na ki jaka ring phlim ba itynnad.

Ka bynta kaba khampher ha kane ka jingwan jong ka Myntri ka long ban pyllait paidbah ïa ka jingphah ai ki sohtrun na ka jylla ban leit shalan sha Lulu Group, Dubai kaba long kawei pat ka sienjam ban kyntiew ïa ki marrep ban shalan sha bar.

Kum shibynta jong kane ka jingwan ba saw sngi sha Meghalaya, ka Myntri kan leit ruh sha Sohra ha ka 12tarik mynta u bnai ban ïa kynduh ïa ki SHG, FPO bad ruh ïa ki LakpatiDidis na ka jylla ha kaba ka Myntri ka Rep ka Riang ka Jylla Dr. M Ampareen Lyngdoh kan donlang.

Khyndiat haba ïadei bad kane ka Commercial Complex ba plie ha kane ka sngi Palei ha Polo, la ïoh jingtip ba ki don haduh 109 tylli ki dukan, kin don ruh ki jaka bam bakyrpang bad ki jaka ïalehkai ne Gaming Zone.

Nalorkata, kin don ruh ki ophis treika, ki jaka ieng kali bad bun kiwei kiwei pat kiba la shna katkum ka juk mynta.

U Myntri Rangbah ka jylla u Conrad K Sangma haba kren ha ka jingïalang u la ong ba ula ïatreilang la bun snem bad ka Myntri ka Sorkar Pdeng bad kumta u la shem ba ka long ka Myntri kaba sbun bad kaba peit kyrpang ïa ka Meghalaya haba ki leit ban pan ïa kano kano ka skim.

Shuh shuh u la ïathuh ba ka Jylla ka la myntoi bun bha na ka “Scheme for Special Assistance to States for Capital Investment” (SASCI) Scheme bad ka Meghalaya kadei ruh napdeng ki katto katne ki jylla kaba la ïoh pyndonkam bha ïa kane ka scheme. U la ong ba kane ka Shopping Complex, kadei kaba la pynwandur na ka bynta ki paidbah ka nongbah Shillong bad kane kadei ka jingsdang bad nangne shakhmat yn sa ïohi shuh shuh ïa ki projek ki bapher bapher.