Shillong, Nohprah 09 : U Myntri ba peit ïa ka tnad ka Koit ka Khiah ka jylla, Bah Wailadmiki Shylla u la pyntip ba ka jingthungkam ïa palat 150 ngut ki doktor ka la sdang lypa na ka bynta kylleng ki Community Health Centre (CHC) bad ha ki Primary Health Centre (PHC) kiba don ha rilum Jaintia.
Ia kane la pyntip da ka Western Zone jong ka Jaintia National Council (JNC) ha ka sngi Ba-ar hadien ba ki la dep ban kynduh ïa u Myntri halor ka jingduna ki nongtrei ka koit ka khiah bad kiwei ki jingdonkam kiba bun ha kylleng ki jaka sumar kiba don ha rilum Jaintia.
“Na ka liang u Myntri u la pynthikna ïa ka kynhun ba ka sorkar ka shim khia ban weng ïa kine ki jingeh. U la ong ruh ba ka jingpynrung kam kumba 150 ngut ki doktor na ka bynta ki CHC bad PHC ka la dep sdang, bad ngin shimkhia ban peit ïa ka jingduna dawai bad kumjuh ki tiar sumar,” ong u President ka JNC-WZ u Hamehi Bamon ha ka kyrwoh.
“U Myntri u la pyntip ruh ba shen yn sa lah ban leh ïa ka MRI ha Jaiñtia Hills, ha kaba ka jingïakren ka dang ïaid shakhmat bad kawei ka kompeni ban pynbiang ïa ki tiar,” u la ong.
Une u nongïalam ka JNC u la ong ba naka liang ka DHS, Dr. JS Momin ka la kubur ïa ki jingeh ba ka tnad ka ïakynduh da kaba kdew ïa ka jingduna ki specialist ha ki katto katne ki jait jingsumar.
“Ka la pyntip ba ki thmu ban thung ïa ki specialist ha man la ki CHC bad PHC, hynrei ki ïakynduh jingeh namar ka jingduna ki samla ba pyntbit ha kane ka kam,” ong u Bamon.
Shuh shuh u la ong ruh ba ka Dr. Momin ka la pyntip ba la dep ban thung ïa ki doktor ha ki district hospital bad ki la phah ïa ki samla pule na ka bynta ki jinghikai pyntbit.
