Palat 13 snem ym pat lah ban pyndep ïa ka ‘BIET’ ha Sakwang | hiar jurip ka FKJGP
Mawkyrwat, ‘Nailar 28 : Ka long kaei kaei ka jingduhnong kaba khraw ïa ka dong ka thaiñ bad ka distrik khamtam eh na ka bynta kito ki samla kiba don jingthmu ban pyntbit ha ka liang lyngba ki lad jingshahhikai ne training lyngba ka Block Institute of Education and Training (BIET) namar kumba ka long mynta ki la hap ban beh haduh Nongstoiñ ban pyndep ïa kane ka bynta.
Namarkata, da ka jingsngewkhia halor kane ka bynta mynta ka sngi ka 28/08/2025 ka Federation of Khasi Jaintia & Garo People (FKJGP) jong ka South West Khasi Hills District hapoh ka jingïalam jong u bah Kenes Lyngdoh Nonglait, President ka FKJGP jong ka South West Khasi Hills District ki la leit ban ïa kynduh bad pan jingshai na u Deputy Commissioner, South West Khasi Hills District halor ka jingbym pat lah pyndep ïa ka jingtei jong ka Block Institute of Education and Training (BIET) kaba don ha shnong Sakwang, South West Khasi Hills District.
Lah pynkynmaw ba katei ka jingtei kaba la sdang la palat phew snem tam hynrei haduh mynta ka dang sahdien bad ym pat lah ban pyndep ne pynwan dur katkum ka jingthmu ne ka plan. Kumta na ka jingbym biang jong kane ka la wanrah ka jingduh jingmyntoi ïa ki samla pule jong ka distrik kiba thrang ban pyntbit ha ka kam hikai.
Ym tang kata, na ka liang ka FKJGP ha ka jingleit ban ïa kynduh ka la kyntu jur ïa u Deputy Commissioner ba un tuklar lem bad ban pynsngew ruh sha ka tnad pule puthi jong ka sorkar Meghalaya ban pyndep noh kloi ïa ka jingtei khnang ba kan long ka jingmyntoi ïa kiba bun ki samla pule jong ka thaiñ.
Ka seng ka pynpaw ka jingkyrmen ba lyngba kane ka jingkyrpad na ka liang ka sorkar lyngba ka tnad pule puthi jong ka sorkar kan sa shimkhia bad ka jingtei ka Block Institute of Education and Training (BIET) ha Sakwang kan sa pyndep noh kham kloi, na ka bynta ka bha ka miat jong ka distrik bad ka jingroi jong ki nonghikai ha ki lad jinghikai.
Kiba ïa donlang ha kane ka sngi ki long naduh u bah Balse Kharbani uba dei u General Secretary jong ka FKJGP jong ka South West Khasi Hills District, u bah Enbor Syiem, General Secretary FKJGP Mawkyrwat Circle, lem bad ki dkhot jong ka seng.