Palat 120 tylli ki projek ba shongdor 480 klur ban pynbha ïa ki ïing bishar kylleng ka jylla

Shillong, Lber 12 : Ki la don palat 120 tylli ki projek kiba shongdor 480 klur tyngka hapoh ka centrally sponsored scheme (CSS) ki don mynta ha ka jingpyntrei na ka bynta ban pynbit pynbiang ïa ki jaka treikam ne ki iing bishar ha Meghalaya.
Ïa kane la pyntip da ka Myntri ka tnad Law jong ka sorkar jylla, Kong Ampareen Lyngdoh haba jubab halor ka cut-motion ba wanrah da u MAL ka Nongkrem Bah Ardent Miller Basaïawmoit ha Iing Dorbar halor ka rukom treikam ka tnad ain.
“Hapoh ka CSS, ka projek kaba kongsan kaba dang pyntreikam mynta ka long ban tei ïa ki District Court bad ki Sub-Divisional Court ryngkat bad ki jaka sah”, la ong ka Myntri da kaba bynrap “Haduh mynta la pyntreikam haduh 120 tylli ki projek CSS na ka bynta ban tei ïa ki jingtei ba ïadei bad ka kam bishar ha ka jinglut baroh kaba long Rs 480.41 klur tyngka, ha kaba ka CSS ka la dep ban pyllait 177.86 klur tyngka bad 10 persen ka bhah jong ka sorkar jylla kaba long 19.76 klur kaba la dep pyndonkam.
Ka Myntri kala ong ruh ba na bynta kane ka snem, ka sorkar jylla ka la lah ban pyntreikam 37,76,66,665 tyngka kynthup ïa ka 90 persen ka bhah jong ka CSS na ka 16 klur kaba la mang ban pyllait na ka bynta ka jylla kaba kdew ba ka jylla ka buh hakhmat na ka bynta ban pynbha bad pynjanai ïa ki jingtreikam ha ki kam bishar.
Haba pynpaw ba ki ïingbishar ba kyrpang (special court) la bthah da ka POCSO Act ryngkat ka jingbei pisa na ka CSS, ka myntri ka la pyntip ba la thaw san tylli ki POCSO special court, ha nongbah Shillong (2 tylli ki POCSO Court) bad mar kawei ha Nongpoh, Jowai, Nongstoiñ.
Hapoh ka CSS na ka bynta ki fast track court, ka la ong ba ka jylla ka la mang 6,11,55,223 tyngka naduh u snem 2020-2024 kaba long 5,42,89,750tyngka na ka bhah jong ka sorkar pdeng bad 68,65,473 tyngka pat na ka skim jong ka jylla. Ka jingpynlut baroh haduh mynta ka sngi ka long 3,42,03,221 tyngka.
Ka myntri ka la pyntip ba kiwei pat ki projek kiba heh lyngba ka skim jong ka sorkar jylla ki kynthup ïa ka jingshna ïa ka High Court of Meghalaya bad ki ADR bad Mediation Centre ha Shillong bad ha Tura da kaba bynrap ba ka projek thymmai ban sdang na ka skim jong ka jylla ka long ka jingshna ïa ka permanent campus jong ka NLI, Meghalaya bad ka ADR bad ka Mediation Centre ha ki district kiba dang sah.
Ka Myntri ka la pyntip ruh ba ka tnad jong ka ban pynkhreh ïa ka kynhun jong ki muktiar haba ïadei bad ka High Court bad District Court. Ka ong ruh ba kito ki nong apali kiba la biang ka kyrdan kumba la kdew ha ka CrPC bad BNSS ki la biang ban don bynta.
Ka pyntip ruh ba ka Meghalaya Legal Services Authority ka dei treikam hapoh ka Legal Services Act, 1987. Ka pyntip ruh ba ka kam jong ka, ka long ban ai jingïarap haba don ki nongshong shnong kiba dei na kiba kham duna la ka long kiba duk ba kyrduh, ki SC/ST, ki longkmie bad kiwei kiwei kiba ym lah ban bei ïa ka jinglut ban buh nongïasaid.
Ka ong ruh ba na ka bynta ban lah pynbeit ïa ki mukoduma kiba ïadei bad ki ishu kali, kam ïa kajia shi-iing, ka Authority ka pynlong ïa ki lok adalat na ka bynta ban pynbeit ïa kum kitei ki jingïakajia.
La pyntip ba ka Authority ka pynlong ruh ïa ki jingïalang kiba heh kylleng ka jylla ban sam ïa ki jingpynshai bad ki jingtip shaphang ki skim jong ka sorkar pdeng bad sorkar jylla kiba la pyntreikam da ka sorkar bad ban pynshai ïa ki bad ïarap ruh ïaki kumno ban ïoh ïa kine ki skim.
Shuh shuh la pyntip ba u Chief Justice jong ka Meghalaya High Court u dei u Patron in Chief jong ka Authority bad peitngor ïa baroh ki jingtreikam jong ka.