Palat 1000 tylli ki Ration Card ladep pynphai ki paidbah: Myntri Food Civil Supplies

Shillong, Naitung 25 : U Myntri ka tnad Food Civil Supplies & Consumer Affairs ka sorkar jylla, Bah Comingone Ymbon ha ka sngi Thohdieng u la pyntip ba ki la don palat 1000 tylli ki card rashon ba ki paidbah ki wan ban pyndem noh hadien ba ka sorkar India ka la bthah ba dei ban pynïasoh noh bad u Aadhar ban ïoh ïa kitei ki jingmyntoi na ka sorkar pdeng.
Haba kren bad ki lad pathai khubor hadien ka review meeting bad ki Deputy Commissioner (Supply) na kylleng ki distrik jong ka jylla, u Myntri u la ong ruh ba da ka jingpynïasoh bad u Aadhar la lap lut ïa kiba don ar tylli lai tylli card rashon (duplicacy) bad kiwei kiwei ki bym dei hok shuh ban ïoh ïa kane ka bhah khaw rashon.
“Hynne ka sngi, kumba 1000 tylli malu mala, kynthup ïa kumba 400 tylli ki card rashon ha Ri Bhoi, ha East Khasi Hills kumba 600 tylli, South West Khasi Hills hapoh 100 tylli kiba wan pynphai noh ïa ki card tang na ka daw ba lap na u Aadhar,” ong u Myntri.
U Myntri u la ong ruh ba ka jingphah jong ka sorkar pdeng ban pynïasoh Aadhar ka wallam ïa ka jingtreikam kaba khuid bad kaba shai bad khamtam ban lap ïa kiba leh thok.
Katkum ka jingïathuh jong u, hadien ba la pynïasoh ïa u Aadhaar lyngba ka eKYC, la lah ban tip lut ïa ki bym dei hok ban ïoh, kiba treikam sorkar bad kiba don card artylli, bad bynrap ba kane ka la ïarap bha ban pynduh ïa ka jingleh thok.
“Shisien ba la don Aadhar la tip mano kiba trei kam sorkar ne kiba don card rashon ar tylli bad kumta ter ter. Kane ka la ïarap bha ban pynduh ïa ka jingleh thok ïa ki card rashon,” u la ong.
Shuh shuh haba jubab halor ka jingkylli, u Myntri u la ong ruh ba ha ka jaka jong kitei kiba la wan ban pynphai noh ïa ki card rashon yn sa thep noh da kiwei.
“Kito kiba aplai nyngkong ki dei ban ïoh hadien ba ka Department ka la dep ban pynshisha. Nga la dep bthah ïa ki ba kin da bishar bniah bha khnang ba kan ym don kano kano ka jingleh shilliang khmat bad ba kito kiba dei hok ban ïoh, ki dei ban ïoh.”
U Myntri u la ong ba kawei pat ka jingeh kaba lah ban mih biang ka long ba lada ym leh ïa ka e-KYC wat ka subsidy kaba ïadei bad ka bai kit ïa u khaw rashon ruh lah ban duh noh. Kumba long mynta wat ïa ka bai kit bai bah ïa u khaw rashon la siew da ka sorkar pdeng, u la bynrap shuh shuh.
“Na ka liang ka sorkar pdeng hi ka la bthah ïangi ba ka e-KYC ka dei kaba donkam tam.”
Haba pynpaw ba kiba bun ki briew ha ka Jylla ki khih khohreh yn da la poi ka um ha ryndang, u Myntri u la ong ba ka Sorkar India ka la ai por haduh ka 30 tarik Jylliew ban pynïasoh Aadhaar bad ka card rashon card, hynrei haduh mynta tang 63.5 percent kiba la pynïasoh.