Shillong, Nailar 11: U Myntri Rangbah ka jylla u Conrad K Sangma ha ka sngi Palei u la ïathuh ba ka sorkar ka la dep ban pynlait pisa palat 1,000 klur sha ki nongrep lyngba ki skhim kiba pher bapher bad ruh lyngba ka FOCUS ha kine ki saw snem kiba la dep.
U Myntri Rangbah u la kam ba ka FOCUS ka dei ka prokram kaba heh tam ha ka jylla kaba la lah ban ai jingïarap sha palat 4.5 lak ngut ki nongrep. “Dei hadien ba ngi ïohi ïa ka jingjop jong kane ka FOCUS ba ka sorkar ka la rai ban bteng shuh shuh ban ai jingïarap sa 5,000 da kaba pynmih sa ka FOCUS+” u la ong.
U Myntri Rangbah u la ong ruh ba lyngba ka FOCUS la lah ban seng jan kumba 18,000 ki kynhun jong ki nongrep ba pynmnih mar. shuh shuh u la ong ba kumba 2.5 lak tylli ki longiing kiba la ïoh jingmyntoi na kane ka prokram.
Shuh shuh u la ong ba kane ka pisa ba 5,000 tyngka ka dei ka bai ïarap ba kin pynbha ïa ka rep ka riang ban pynheh ïa ka jingïoh kamai.
U la ong ruh ba ka jingpynlong ka sorkar ïa ki Food Show ha Shillong ka dei ban pyni nam sha ka pyrthei ïa ki mar rep kiba pynmih na ka jylla bad ba lyngba kane kiwei kin bna bad kin tip ïa ki mar ki mata ba pynmih na ka jylla. U myntri Rangbah u la ong ruh bba lyngba kiba bun ki lad ki lynti ka sorkar ka la lah ban pynwad iew ïa kiba bun ki mar ha kylleng ki bynta jong ka ri bad ka pyrthei.
Ha kane ka jingpynlait paidbah ïa kane FOCUS+ u Myntri Rangbah ryngkat u Government Chief Whip Marcuise Marak, u nongai buit sha u Myntri Rangbah u Thomas A Sangma ki la sam ïa ki cheques sha ki 40 tylli ki Producer Groups kaba kot haduh kumba 22.95 lak.
