Palat 100 kynta ba la shah tngan dang biang ka koit ka khiah u Bah Ardent

Shillong, Jymmang 27: Ka jingshah thngan jong u Bah Ardent kaba u la sdang naduh ka sngi Ba-ar ka la kynjoh sha ka palat 100 kynta. Kane ka jingshah thngan un Bah Ardent ka dei ban pynbor ïa ka sorkar ban pynkylla thymmai ïa ka reservation policy.
“Nga biang bad nga koit nga khlaiñ da ka jingshan bor jong u Blei bad ka jingduwai kiba bun na ka bynta jong nga,” ong u Bah Ardent haba ïakren bad u Mawphor.
“Ki paidbah kim dei ban khuslai na ka bynta u Bah Ardent hynrei na ka bynta ki khun samla bad u Bah Ardent un ym randien da leilei ruh ngin ïakhun haban da jop,” u la bynrap.
Na ka liang ki doktor kiba wan ban buddien ïa ka koit ka khiah jong u ki la ïathuh ba ka don ka jingkiew ka BP u Bah Ardent hynrei kam don jingma eiei namar ka dei hi ban kiew namar u la shah thngan la bun sngi.
Lah ban sakhi ba kane ka jingshah thngan u Bah Ardent ka la nang ïoh ka jingkyrshan kaba nang khlaiñ na ki paidbah naduh dang step phyrngap haduh da miet kiba ieng laiñ ban kitbok ïa u ba un koit u khiah hapeng ka jingïakhun pyrshah ïa ka sorkar.
La ïohi ba ha kane ka sngi da kiba bun bah ki paidbah ki la jaw ummat haba ïohi ïa u Bah ardent ba um lah shuh ban ai khublei ïa ki paidbah kumba baroh shikatto hynrei uba la ai kuhblei beit da kaba shu rahkti na jaka thiah ba la pynkhreh kyrpang.
Ha kane ka sngi la ïohi ba kiba bun ki kynhun seng bhalang bad ki kynhun bapher bapher ki la wan ban ai jingkyrshan ïa kane ka jingïakhih ka VPP.
La sakhi ruh ha kane ka sngi ba uwei na ki shipai ïakhun Hills State u Bah Ronsing Nongkynrih ruh u la wan ai jingkyrshan ïa kane ka jingïakhih jong u Bah Ardent.
“Ka sorkar kam dei ban kheiñ kai ïa kane ka jingdawa ka VPP namar lada jia eiei ïa u Bah Ardent nga ïohi ba ka jingïakhih kaba jur kan bteng bad ka jingïakhih kaba yn ym don sorkar ba lah ban tem namar lada phi shong ha taxi ne ha ïew ha hat ne phin peit ha ki rynsan social media kane ka jingïakhih u Bah Ardent ka la ïoh jingkyrshan pura ym shuh tang na ki kmie ki kpa hynrei wat ki khynnah pule ruh ki ïakren beit sha kane bad lada ka sorkar ka bakla kan hap shim jingkit khlieh lada ka mih kaba kum kata,” ong uwei u nonghikai kolej ubym kwah ban pynpaw kyrteng.
“Phin ïohi ïa ka jingïakren ha ki comment ha social media ka dei ka jingmaham beit ïoh jia eiei ïa u Bah Ardent te kin mih ïakhih kaba yn ym lah teh lakam shuh bad nga ïohi kan long shisha kumta bad ngan ïathuh ïaphi lada dei ba u Bah Ardent u poi tang sha hospital lada kem ka jingtlot ka jingbtehi ka jingïakhih pyrshah sorkar kaba kumno phin ym lah shuh ban mutdur,” ong sa uwei pat u nongïalam seng bhalang ba la shongthait.