Shillong, Jymmang 19: Ki nongdie jingdie ha madan bad ki rud lynti ha nongbah Shillong hapoh ka shatri jong ka Seng Meghalaya & Greater Shillong Progressive Hawkers & Street Vendors’ Association, ki la shad kmen da kaba pynlong ka jingot Cake hakhmat dukan Bimola namar ba ka sorkar jylla ka la pyntip hakhmat ka ïingbishar ba kan pynduh noh ïa ka aiñ jong ka jylla, hynrei kan pyntreikam noh ïa ka aiñ jong ka sorkar pdeng na ka bynta ki nongdie jingdie ha madan.
Ha kane ka jingïa ot Cake kum ka dak ban lehkmen ïa kane ka jingïakhun jong ki, la ïadon lang ruh i Kong Angela Rangad, nongaibuit jong ka Seng, u Rev Kyrsoi Pyrtuh, uwei na ki nongïalam ba ju don bad ka Seng ryngkat ki spah ngut ki nongdie jingdie ha madan jong ka nongbah Shillong.
Ha ka jingtian bishar jong ka High Court, ka sorkar ka la pyntip ba kan weng noh ïa ka aiñ ban khang bad pyrkhing ïa ki briew ba kin die jingdie ha ki rud surok bad ki rud lynti, hynrei kan pyntreikam noh ïa ka sorkar pdeng, kaba ong ba kadei ka kamram jong ka sorkar ban ai ne ïit da jaka kaba biang na ka bynta ki nongdie jingdie ha madan.
“Kane kadei ka jingjop jong baroh kito kiba shu die jingdie ha madan”, la ong i Kong Angela haba kren ha kane ka jingïalang hadien ba ladep pyntian Cake da ki longkmie ba ju shong die jingdie ha madan.
I la ïathuh ba naduh ka snem 2015 na ka liang jong ka TUR ki la ïadon lang bad kine ki nongdie madan hadien ba ki la shah pyndik bad shah beh man ka por ha ki Pulit bad ki bor jong ka Shillong Municipal Board. “Ka jingbeh ïa ki ruh ka long kumba ïalehkai ka miaw ba i khnai, shiphang beh shiphang shah”, la ong i Kong Angela.
Hadien pat ka TUR ka la pynseng noh da ka Meghalaya & Greater Shillong Progressive Hawkers & Street Vendors’ Association ban ïakhun ha ïingbishar hadien ba ka sorkar jylla ka la wanrah da ka aiñ la jong bad kam treh ban pyntrei da ka aiñ jong ka sorkar pdeng. I la ïathuh ba ka aiñ jong ka sorkar pdeng kadei kaba biang bha lada ka sorkar jylla ka pyntreikam, namar ba ka la batai sha bha kumno ban peit ïa ka bit ka biang jong ki nongdie jingdie ha madan.
Hynrei ha ka jingïakhun ha ïingbishar, ka sorkar jylla ka la pyndem noh bad rai ban pyntreikam noh da ka aiñ jong ka sorkar pdeng.
Ha kajuh ka por ki nongdie jingdie madan, ki la pynpaw ka jingkmen bad ai ka jingïaroj ïa i Kong Angela Rangad bad kiwei de ki nongïalam ka Seng kiba la trei shitom na ka bynta jong ki. Ki la ong ba ki don ki jingkynnoh ba i Kong Angela bad kiwei ki nongïalam ki ju ïoh pisa na ki nongdie jingdie ha madan, hynrei kane kadei kaba shu kren tang ban lait jynhaw, namar ki nongïalam bad i Kong Angela kim ïoh nong wat tang shi tyngka ruh na kane ka kam. Ki la ïathuh ba ki shu lum pisa 10 tyngka shi bnai na ka bynta ki jingdonkam jong ka Seng kum ha kaba phah type kot, phah photo copy bad kiwei kiwei de ki jingdonkam, ym ban ai sha i Kong Angela ban ïohnong kumba la kynnoh.
Ki la ong ruh ba wat ki briew ka Municipal ki la tyrwa ban ai jaka kaba bit ba biang ban shong die jingdie lada ki mih ne iehnoh ïa ka Seng, hynrei ki nongïalam jong ngi, kim shym la treh, namar ba ki kwah ban kyntiew lang ïa baroh ki nongdie jingdie ha madan.