Shillong, Nailar 23: U Myntri Rangbah ka jylla u Conrad K Sangma ha ka sngi Baar u la ïathuh ba ka sorkar da leilei ka sorkar kan ym pynkylla biang ïa kaei kaba la ïa soi ha ka MoU hapdeng u Myntri Rangbah ka jylla bad u Myntri rangbah ka Assam ha kaba ïadei bad ka jingpynbeit ïa u pud u sam.
Haba kren sha ki lad pathai khubor hadien ba mih na ka jingïalang hapdeng u Myntri Rangbah bad ki kynhun sengbhalang ba kynthup ïa ka ADE, KSU, FKJGP, GSU bad kiwei kiwei, U Myntri Rangbah u la ïathuh ba ka jingwan ïakynduh ki seng bhalang ka dei ban buh ka jingkyrpad ba ka sorkar ka dei ban pynïoh biang ïa ki katto katne tylli ki shnong kiba leit sha Assam.
U la ïathuh ba kine ki shnong kiba leit sha Assam ki dei ka kaiphot jong u snem 2011 kam shym la kam ba kine ki shnong ki dei jong ka jylla Meghalaya.
Shuh shuh Myntri Rangbah u la ong ba na ka liang ka sorkar kan ym lah satia ban pynkylla biang ïa ka MoU namar ka sorkar ba synshar ha u snem 2011 ka la aiti sha ka sorkar Assam ïa ka Map ba ka kam trai ïa ki jaka naduh utei u snem bad ba ka jingpynbeit pud kaba la leh ha u snem 2022 ka dei beit kat kum ka kaiphot bad ka jingpruid dak ba la ai ha u snem 2011.
“Ngi la pyni ïa ki kynhun seng bhalang ïa ki kot ki sla bad ki map kiba ka sorkar ha kito ki snem ka kam bad ïa kine ki shnong kiba ki seng bhalang ki kwah ban wan sha ka jylla ka la kdew shai ba ki don ha ka jylla Assam bad na ka liang jong ngi ngi kren da kaba shai ba da leilei ka sorkar kan ym lah ban bishar biang na bynta ban pynkylla ïa ka MoU” u la ong
U Myntri Rangbah u la ïathuh ruh ba na ka liang jong u un ïakren bad u Myntri Rangbah ka jylla Assam na bynta kine ki shnong ba kynthup ka Garojan, Damarangkona, Bolsum, Balsrik bad ka Watre Rong-Rong kiba kwah ban wan beit sha ka jylla Meghalya namar kat kum ka jingkam jong ki la ong ba ki nongshong shnong ki pynpaw ïa ka jingangnud ban don bad ka Meghalaya.
Haba ïadei bad ka jingpynbeit pud ïa ka wat kaba ar u Myntri Rangbah u la ong ba ka sorkar kan ïaid beit sha khmat ïa kane ruh.
