Ong ‘EM’ ïa u drok bad ki jingdih ba sniew bad ong hooid ruh ïa ka pule puthi: Bah Renikton

Mawkyrwat, Rymphang 14 : Ka Jawahar Navodaya Vidyalaya (JNV), South West Khasi Hills District lyngba ka tnad pule puthi jong ka sorkar India mynta ka sngi ka 13 tarik u Rymphang 2026 ka la ïoh ban pynlong ïa ka prokram ba kyrpang ba la tip kum ka ‘Football to School (F4S)’ hapoh ka Hall jong ka JNV, South West Khasi Hills District ha kaba u Bah Renikton Lyngdoh Tongkhar uba dei u MLA ka Mawkyrwat Constituency kum u kongsan.
Lah ban kdew ba ka jingthmu jong ka Football for Schools (F4S) ka long ban noh synñiang sha ka jingnang jingstad, ka jingroi ha ka ïalehkai, bad ka jingpynkupbor ïa kumba 700 million ngut ki khynnah. Ka wad ban pynlong ïa ka phutbol kaba kham suk ban ïoh ïa ki khynnah shynrang bad kynthei ha kylleng ka pyrthei da kaba pynrung ïa ki kam phutbol ha ka rukom hikai, ha ka jingïatreilang bad ki bor ba dei peit bad ki nongshimbynta. Ïa kane ka F4S la sdang ha India da ka Fédération Internationale de Football Association (FIFA).
Shuh shuh ïa kane ka prokram la pynlong lyngba ka jingïatreilang bad ka FIFA da kaba ki la ïoh ban ïa ki bol kynjat sha ki 18 tylli ki skul hapoh ka thaiñ kaba long kum shibynta ban pynshlur ïa ki khynnah skul ha ki kam ïalehkai kynjatbol khnang ba ki khynnah ki ïoh lad ban sei ïa ki sap ki phong ki jong ki ban pynmlien ia lade ha ki kam ïalehkai da kaba ong, ‘HOOID’ ïa ka jingïalehkai bad ong ‘EM’ ïa u drok, ïa u duma sikret bad kiwei de ki jingdih ba sniew bad dei ruh ban ong haoid ïa ka pule puthi ruh.
Kiwei kiba la donlang ki long Bah B. Jyrwa, MPS, Superintendent jong ki Police South West Khasi Hills District, ka Kong Ritalin Sohkhlet, DSEO, South west Khasi Hills District, u Principal ka JNV, u Nilesh D. Hingmire, ki nonghikai bad ki khynnah skul.