Shillong, Risaw 16: Ka Sawmer SC ka la sdang ïa ka lynti ïaid jong ka ha ka lympung OC Blue Shillong Premier League 2024 da ka namjop hadien ba ka la pynliem noh da 3-2 kol ïa ka Nangkiew Irat SC ha ka jingïakhun kaba itynnat ha SSA Stadium – First Ground, Polo, ha ka sngi Balang.
Tad haduh ka 56 minit jong ka por ka Sawmer ka la ïoh ban lamkhmat haduh 3 kol (khlem da shah thep), shuwa ba ka Nangkiew Irat kan pynkhihwin shipor ïa ka jingïakhun da kaba pynkhihjar haduh 2 tylli ki kol kaba la pynsmiej ïa ka Sawmer.
Ka kol kaba nyngkong na bynta ka Sawmer ka la jia hadien ka jingbym skhem ki bak ka Nangkiew Irat kaba la plie lad ïa u Diego Khyriem (6’minit) ban pynkhih ïa ka kol kaba nyngkong ha ka kylla step. Ka la don ruh ka jingpyrta ‘handball’ ha phyllaw kol jong ka Nangkiew Irat hynrei u referee u khlem shym la ïohi eiei kaba bakla.
Tang hadien ba la bteng biang ïa ka kylla miet u Hilford Lyngkhei (49′ minit) u la thep sa ïa ka kol kaba ar shuwa ba u Orestar Sad (56′ minit) un pynbud sa kawei ban ïoh lamkhmat da 3-0 kol bad buh jingkyrmen ïa ka Sawmer ha ka lynti ban khur ïa ka jingjop.
Wat hadien ba ka la shah lamkhmat haduh 3 kol, na ka liang jong ka Nangkiew Irat kam shym la kynrandien satia bad ïai bteng ka jingpyrshang ban pynkhihjar bad dei ha ka 70 minit ba u Isak Vanlalpeka u la ïoh ban pynphai kawei na bynta ka kynhun.
Kane ka la ai mynsiem ïa ka kynhun bad ka jingïakhun ka la nang shongshit hadien ba u Wanpynshngain Nongsteng (78′ minit) u la ïoh ban pynphai ïa ka kol kaba ar. U Wanpynshngain u la thmu ban pashat ïa kane ka bol sha ki paralok jong u hynrei ka jingbym lah ban tehlakam u kol ka liang pyrshah ka la rung ei jlang sha kol.
Kane ka kol ka la pynkyndit thret ïa ka Sawmer, hynrei ka la lah pat ban kyrshan skhem haduh kaba kut jong ka por ban khur ïa ki lai point kiba kongsan.
Shuwa kane, ka jingïalehkai kaba la thmu ban sdang ïa ka samoi hapdeng ki kynhun kiba dang shu kiew kyrdan – ka Laitkor SC bad ka Nongrim Hills SC, hynrei kaba sngewsih ïa ki nongpeitkai, ka Nongrim Hills ka la khur suk ïa ka jingjop lyngba ka walkover hadien ba ka Laitkor kim shym la lah ban pynrung ïa ka kynhun namar ba ki dang hap ban pyndep ïa ka jingpynrung kyrteng ïa ki player lyngba ka rukom pynrung kyrteng jong ka All India Football Federation ha ka por kaba biang ban sdang ïa ka jingïalehkai.
Da ka jingnangkiew bad pawnam ka OC Blue SPL ha ka ri baroh kawei, ka Shillong Sports Association ka la rai ban pyntreikam ïa ka CRS na ka bynta ban pynrung kyrteng ïa ki player ha kane ka lympung mynta u snem. La pyntip ïa kane sha ki klob katto katne bnai shuwa ka samoi ïalehkai bad la ai jinghikai ban jingbatai pura ha kaba ïadei bad ka ka rukom pynrung kyrteng.
Kumta , la rai nongjop sha ka Nongrim Hills da 3-0 katkum ka rukom pynïaid ka lympung.
Ki jingïalehkai ha kane ka sngi Palei (17 tarik Risaw), yn sakhi ïa ka Nongthymmai SC ka ban aireng pyrshah ïa ka Ryntih FC ha ka por 11:50 baje mynstep, bud sa ka jingïakhun hapdeng ki kynhun ba la rah bunsien, kata hapdeng ka Langsning FC bad ka Shillong Lajong FC ha ka por 2:45 baje nohphaisngi.
