Shillong, Risaw 18: Ka Mawlai SC, kaba dei ka kynhun lahduh ba ïada ïa ka burom bad ka Rangdajied United FC ki la nang pynshongshit shuh shuh ïa ka lympung OC Blue Shillong Premier League 2024 ha ka jingïakhun kaba la long ha ka jan miet jong ka sngi Thohdieng, ha kaba ka Mawlai ka la khur ïa ka jingjop da 3-2 kol ha SSA Stadium-First Ground, Polo.
Kane ka dei ka jingïalehkai ba khatduh jong ka wat ba nyngkong bad ka sien ba nyngkong eh jong kane ka samoi ban pynïalehkai ha ka por janmiet da kaba tbeh jingshai da ki kor pynthaba (floodlight), ha kaba ki nongkyrshan kiba thrang bha ban sakhi ïa ka jingïakhun hapdeng kine ki kynhun.
U Khrawkupar Jana (3 ,13’ minit) bad u Fairming Suting (78 minit) ki la pynkhihjar na bynta ka Mawlai katba u Balamlynti Khongjee (4minit) bad u Manbha Iawphniaw (77’minit) ki la thep na bynta ka Rangdajied.
Baroh ar tylli ki kol jong u Khrawkupar u la thep da kaba khyrwit tyngeh da ka kjat kadiang jong u pyrshah ïa ka klob barim kaba u la mih madan mynshuwa, kaba nyngkong ka la jia hadien ba u la ïohpdiang ïa ka bol pashat na u Damanbhalang Chyne. Kane ka dei ruh ka kol kaba stet tam jong ka samoi bud sa ka jubab kaba kloi na ka Rangdajied kaba la pynïakhaid lyngba u Balamlynti.
Ka jingïakhun ka la sdang ban jai jai naduh kane ka por hynrei u Khrawkupar u khlem pat shym la kut ka jingthrang ban pynkhihjar. Sa shi sien pat u la ïoh ïa ka kabu ban khyrwit ïa ka kol kaba ar na bynta ka Mawlai ban lamkhmat ïa ka kylla step.
Na ka liang jong ka Rangdajied ka la lah ban pyntyllun kham janai ïa ka bol ha ka kylla miet bad ka la lah ban thaw ïa shibun ki kabu. Ka kynhun ka la ïoh biang ban pynïakhaid ha ka 77 minit lyngba u Manbhakupar Iawphniaw.
Hynrei sngewsih ba ka jingkmen jong ka RUFC ka la neh tang 60 sekon, hadien ba u Kevin Rymbai u la pynbuh sbiak ïa ka bol na bynta u Fairming ban pynkhih jlang ïa ka kol kaba lai kaba la ïarap ïa ka kynhun ban sdang ïa ka lynti ïaid ïada burom lahduh da ka namjop.
Ka jingïakhun ha kane ka sngi Saitjaiñ, kan long hapdeng ka Nongrim Hills SC pyrshah ïa ka Sawmer SC ha ka por 5 shiteng janmiet. Lah ban kdew ba baroh ar tylli ki kynhun ki la jop ha ki jingïakhun ba sdang jong ki – ha kaba ka Nongrim Hills ka la jop lyngba ka walkover ïa ka Laitkor SC katba ka Sawmer ka la jop da 3-2 kol ïa ka Nangkiew Irat SC.
