Shillong, Naiwieng 13: Ka Langsning FC ka la khur ïa ka jingjop da 3-2 kol ha ka jingïalehkai kaba itynnat bha pyrshah ïa ka Ryntih FC ha ka OC Blue Shillong Premier League 2024 kaba la long ha madan First Ground -SSA Stadium, Polo, ha ka sngi Balang.
Shuwa kane, ka jingïalehkai kaba nyngkong ka la kut ha ka jingïakhaid da mar 1-1 kol hapdeng ka Sawmer SC bad ka Nongthymmai SC. Ka kol lyngba ka penalty ha ka 31 minit na u Ronald Singh Shaikhom na bynta ka Nongthymmai la shah khanglad noh lyngba ka kol ha ka khyllipmat shuwa ban kut jong u Diego Khyriem (90’+4).
Haba phai sha ka jingïalehkai kaba bud, baroh arliang ka Langsning bad ka Ryntih ki la ïoh ban lamkhmat mar kylliang ha kane ka jingïakhun. U Dajiedlang Wanshnong (35’, 70’) bad u Ronney Chel Khongrangjem (90’+1) ki la pynkhihjar na bynta ka Langsning nangta u Dameki Khongstia (58’) bad u Damonlang Pathaw (63’) ki la pynkhihjar na bynta ka Ryntih.
U Dajiedlang u la long u rangïalehkai ba kynsai ka Langsning bad kawei ka bol kaba la pashat na jngai hapoh phyllaw kol ka liang pyrshah ka la wanpoi ha u. U la pynshat tyllun ïa u Allen Lyngdoh Nongbri bad nangta u la pyllait ïa ka bol nalor u Luckystar Lawai, rangapkol ka Ryntih na bynta ka kol kaba nyngkong.
Ka Ryntih ka la ïohlad ban pynïakhaid hadien ba u Dameki u la shimti bad khlem pynsepei ïa ka kabu ksiar kaba u la ïoh ha ka kylla miet ban pynïakhaid ha ka 58 minit. Kane ka kol ka la long ka jingai mynsiem ïa ka Ryntih bad tang kumba katton katne por u Damonlang u la thep ïa ka kol lamkhmat.
Hynrei, ka jinglong jingman ka la sdang ban kylla khongpong, hadien ba ka Langsning ka la ïoh pynïakhaid. Ha ka por ba ki rangapdien ka Ryntih ki dang pyrkhat ba u referee un ai da ka free-kick hynrei phewse ka la jingïalehkai ka la ïaid beit, bad da kaba shim kabu ïa ka jingbym poipyrkhat ki bak ka liang pyrshah u Dajiedland u la pynkhih ïa ka kol pynïakhaid na bynta ka Langsning.
U tei u rangïalehkai ba kongsan jong ka Langsning u la dei hok ban ïoh ïa ka hat-trick hynrei u Luckystar u la khanglad ïa u na ka penalty hadien shiphew minit.
Hadien kane, la khmihlynti ba kane ka jingïalehkai kan kut ha ka jingïakhaid kumba long kaba hashwa, lem da dei ka jingbhabok ka jingpyrshang jong u Ronney. U ne u rangïalehkai ba shadien u la kynjat ïa ka bol sha jrong kaba la kynthih nalor arngut ki nongïalehkai ka liang pyrshah, shuwa ba kan kynthih sa nalor u Luckystar (rangap kol ka liang pyrshah), na ka bynta ka kol jong ka jingjop.
Kane ka namjop ka la kyntiew ïa ka Langsning shabar na ka thup shah sloit (relegation zone) bad kiew sha ka kyrdan ba hynñiew da 6 point, katba ka Ryntih ka bat ïa ka kyrdan ba shatraiduh jong ka miej.
Shuwa kane, u Ronald u la pynurlong ïa ka kol na ka penalty na bynta ka Nongthymmai ban lamkhmat ïa ka jingïakhun ha ka kylla step. Ka Nongthymmai ka la shah pynmong hadien ba shah beh noh u Michaelson Kurbah hadienm ba ïoh arsien ki yellow card, u Diego, hadien ba khlem lah pynurlong ar tylli ki kabu ksiar, u la pynïakhaid thik ha ka khyllipmat shuwa ban kut ka por.
Kine ki point ki buh ïam ka Sawmer ha ka kyrdan ba lai, mynta da 8 point, katba ka Nongthymmai ka la kiew kyrdan ba saw da 7 point.
Ka OC Blue SPL 2024 kan sngeh shuwa shipor na bynta ban ai por ïa ka kynhun Jylla Meghalaya ba kan shimbynta ha ka National Football Championship jong ka Santosh Trophy. Bun na ki player ban mihkhmat ïa ka jylla yn jied na ki klob SPL, ha kaba ka Meghalaya kan sdang ïakhun nyngkong ha ka 20 tarik Naiwieng.
