OC Blue SPL 2024: Da ka namjop kaba shongkun khur ka Ryntih bad ka Shillong Lajong

Shillong, Risaw 17: Ka Ryntih FC bad ka Shillong Lajong FC ki la jop ha ki jingïalehkai jong ki ha ka lympung ‘OC Blue Shillong Premier League 2024’ ba la long ha ka sngi Palei ha SSA Stadium – First Ground, Polo.
Na ka liang jong ka Ryntih ka la pynliem noh ïa ka Nongthymmai SC da 3-0 kol ha ka jingïalehkai kaba nyngkong shuwa ba ka Lajong kan pynliem da 4-0 kol ïa ka Langsning FC ha ka jingïakhun kaba ar.
Ha kane ka sngi la sakhi ruh ïa ka hat trick kaba nyngkong jong ka samoi ba la khyrwit da u Deibormame Tongper jong ka Shillong Lajong, u ba la pynkhih lai kol ha ka 34, 39 bad 72 minit, katba kawei pat ka kol la thep da u Kynsaibor Lhuid (21′ minit) kaba la pynjemkhnap ïa ka Langsning.
U Kynsaibor u la pynpaw ïa ka jingthmu ban pynkhihjar naduh ba sdang ka jingïalekai, ha kaba u la pyrshang bun sien ïa ka bol sha kol bad dei ha ka minit ba 21 ba ka jingpyrshang jong u ka la urlong.
Hadien nangta, u Deibormame, u rangïalehkai ba thep bun kol ha ka SPL 2023, u la thep ar kol ha ka por ba tang san minit, kawei kaba u la shut pynpar na madan ïa ka bol shapoh kol bad kawei kaba u la pyndei tiak da ka khlieh na ka bol pashat corner jong u Kynsaibo.
Haba kut jong ka kylla step ka Lajong ka la ïoh ban lamkhmat haduh 3-0 kol, ka kynhun ka lah ban ïalehkai kham jai jai ha ka kylla step hynrei kam shym la hun satia bad ïai bteng ban ñion ïa ka jingïakhun. Ka Langsning ruh ka la sdang ban pynsmiej katto katne sien ïa ka liang pyrshah hynrei kam shym la lah pat ban pynurlong ïa ki jingthmu jong ka.
Hapdeng ka jingïakhun ban rah bol na kawei ka tduh sha kawei pat, u Deibormame u la ïoh syndon ban kynjoh ïa ka hat-trick hadien ba la pashat biang ïa ka bol sha u. U la ïeng pynthikna bha ïalade shuwa ban khyrwit jlang ïa ka bol shapoh kol.
Shuwa kane ka jingïakhun, ka Ryntih ka la thep lai kol ha ka kynta ba khadduh jong ka kylla step ban khur ïa ka namjop pyrshah ïa ka Nongthymmai. Kiba la pynkhihjar ha kane ka jingïakhun ki long u Yami Longvah (62’ min), Dameki Khongstia (76’min) bad u Wanshanlang Dkhar (86’min).
Ha kane ka sngi Thohdieng kan don tang kawei ka jingïalehkai, kane kan long hapdeng ka kynhun ba wan kyrdan ba ar ha ka aïom ba ladep – ka Rangdajied United FC bad ka lahduh ba ïada ïa ka burom – ka Mawlai SC, ka ban pynlong ha ka por 5 shiteng jan miet.
Shuwa kane, kan don ka jingïakhun semifinal ha ka kyrdan Second Division 2024 hapdeng ka Meghalaya Police bad ka Jongksha SC ha ka por 2 shiteng nohphaisngi.