Shillong, Naiwieng 04: Ka Nongthymmai SC ka la lah ban khur ïa ki lai point kiba kongsan na ka jingïalehkai jong ka lympung OC Blue Shillong Premier League 2024 ha ka Lah Sngi U Blei hadien ba ka la lah ban jop da 3-1 kol pyrshah ïa ka Laitkor SC hakhmat u paidbah ba wan sakhi ïa kane ka kynhun ha madan ïalehkai SSA – First Ground, Polo.
U Ronald Singh Shaikhom (4’P) bad u Michaelson Kurbah (36’, 54’) ki la pynkhihjar na bynta ka Nongthymmai, katba u Fridison Wanniang (38’) u la thep ïa ka shi kol na bynta ka Laitkor.
Haba phaidien, ka Nongthymmai ka la khur ïa ka jingjop kaba nyngkong mynta ka samoi da 3-0 kol pyrshah ïa ka Nongrim Hills SC ha ka taïew ba ladep, katba ka Laitkor ka la jop ar sien lynter shuwa ka jingïalehkai pyrshah ïa ka Nongthymmai.
Tang saw minit mar ïa sdang ka jingïalehkai ka Nongthymmai ka la ïoh da ka penalty hadien ba shah pynur u rangïalehkai jong ka hapoh phyllaw kol ka liang pyrshah, bad ïa kane ka penalty la shimti da u Ronald Singh Shaikhom u ba khlem shym la pynsepei bad buh hakhmat ïa ka Nongthymmai.
Ka Laitkor ka la jan ïoh pynïakhaid ha ka 22 minit hynrei ka jingpyrshang thep kol ka la shu pynsmiej ïa u diengkol shuwa ban lait sharud. Hynrei ka Nongthymmai ka la nang pynskhem ban lamkhmat da kaba pynbud ïa ka kol kaba ar, kane ka kol pat la thep da u Michaelson.
Watla kata ruh, kane ka kol kam shym la pynduh mynsiem ïa ka Laitkor, ha kaba u Fridison u la pynphai shi kol na bynta ka kynhun hadien 2 minit.
Wat hapdeng ka jingkyrshan jong ki paidbah, ka Laitkor ka la sahdien da 2-1 kol haba kut jong ka kylla step. U Michaelson u la pynlong biang ïa ka Nongthymmai ban tam 2 kol hadien 10 minit ba la bteng ïa ka kylla miet da kaba pynkhih ïa ka kol kaba lai ha ka 54 minit. Kane ka dei ka kol kaba 50 jong ka OC Blue SPL 2024 mynta ka samoi bad kaba saw ïa u Michaelson na ki lai sien ïakhun; mynta u don ha ka thup ba ar ban ïaknieh ïa ka nam Top Scorer.
Ka jingïalehkai kaba bud kan long hapdeng ka Shillong Lajong FC pyrshah ïa ka Mawlai SC ha ka por 5 baje janmiet.
