Shillong, Naiwieng 10: Ka Shillong Lajong FC bad ka lahduh ba ïada ïa ka burom – ka Mawlai SC ki la bteng ban long ki kynhun ba khlaiñbor ha ka lympung OC Blue Shillong Premier League 2024 da kaba khur jingjop ha ki jingïalehkai jong ki ba la long ha SSA Stadium- ha madan First Ground, Polo, ha ka sngi Saitjaiñ.
Na ka liang jong ka Mawlai ka la lah ban pynliem noh ïa ka Nangkiew Irat SC da 2-1 kol ha ka jingïakhun kaba nyngkong katba ka Lajong ka la pynjemkhnap ïa ka Ryntih FC da 3-0 kol ha ka jingïakhun kaba la long ha ka por jan miet.
U Iohborlang L Lyngkhoi (14’), u Deibormame Tongper (73’) bad u Yohaan Benjamin (80’) ki la pynkhihjar mar kawei na bynta ka SLFC kaba la pynjemkhnap ïa ka Ryntih, katba ka Mawlai ka la mad ïa ka jingïakhun kaba jwat hynrei ka la lah pat ban khur ïa ka jingjop. U Donlad Diengdoh (27’) bad u Arkibor Makhroh (60’) ki la pynkhihjar na bynta ka Mawlai, katba na ka Nangkiew Irat la thep da u Wallamsuk Nongkhlaw (43’).
Baroh arliang, ka Lajong bad ka Mawlai ki la kamai mynta mar 10 point hynrei ka SLFC ka la ïoh ban bat ïa ka kyrdan ba nyngkong lyngba ka jingïapher kol (goal difference), kaba ïeng mynta da +8 haba ïanujor bad ka Mawlai’ kaba long +5 ka jingïapher kol.
Ki jingïalehkai ka lympung OC Blue SPL kin bteng biang ha ka sngi Balang. Ha ka jingïalehkai kaba nyngkong yn sakhi ïa ka Sawmer SC ka ban aireng pyrshah ïa ka Nongthymmai SC ha ka por 1 baje mynsngi bud sa ka jingïakhun hapdeng ka Langsning FC pyrshah ïa ka Ryntih ha ka por 4 shiteng mynsngi.
