Nongbah Lyiur ha Jowai : Ngan kmen eh lada ka sorkar ka lah ban pynurlong : Kyrmen Shylla

Shillong, Jymmang 21 : U Myntri ka tnad Revenue and Disaster Management ka sorkar jylla, Bah Kyrmen Shylla u la ong ba un jin da la kmen eh lada ka sorkar jylla ka lah shisha ban pynurlong da ka Nongbah Lyiur ha Jowai kumba la dawa da ka seng Jaintia Student’s Union dang shen.
“Lada ka sorkar ka lah ban pynurlong, kan long kaba sngewtynnad lada pynkylla Nongbah Lyiur lane Nongbah Tlang ruh. Hynrei lada kren ïa ka jingshisha pat ka jinglut kan long kaba bun bha, nalor donkam ruh ïa ki briew kiban trei bad kumta ka jingdonkam kan long kaba jur haduh katta katta,” u la ong haba kren bad ki lad pathai khubor.
U Myntri u ong ruh ka long kaba sngewtynnad ba don kiba mih ban dawa hynrei ka shong pat ha ka sorkar ban shim ïa ka rai bad ban bishar bniah halor kane. “Ban pynurlong ïa kane, ka shong ha ka sorkar ban da bishar bniah bha shwa kumno ban leh namar kam dei satia ka kam kaba suk,”u la bynrap biang.
Katkum ka jingong jong u, ki paidbah ki lah ban dawa na ka bynta ka jingdonkam hynrei na ka bynta ka sorkar pat kan ym lah satia ban leh lut baroh ha kajuh ka por.
“Ka por kan sa poi ban urlong kita ki jingdawa bad ki jingtyrwa bad ngi ruh ngi pdiang ïa kata hynrei lano kan urlong pat, ka por hi kan sa batai,” u la ong.
Dang shen wat naka liang u MLA ka NPP na Jowai u Bah Wailadmiki Shylla u la ong ba un hap ban ïasyllok shwa bad ki nongshong shnong ha kaba ïadei bad ka jingdawa ban pynlong ïa ka Jowai, ka district headquarter jong ka West Jaiñtia Hills, kum ka nongbah ban pynlong ïa ka nongbah Lyiur ne ka summer capital jong ka jylla.
Lah ban kdew hangne ba ka Jaiñtia Students’ Union (Central Body) ka la dawa ba lada jia ba la pynbna ïa ka Tura kum ka Winter Capital jong ka Jylla Meghalaya, kumta ka Jowai ka dei ban ïoh ïa ka Summer Capital. U ong ruh ba ka Jylla Meghalaya ka dei kaba don lai tylli ki jaidbynriew trai ri trai muluk kiba kongsan kata ki Jaiñtia, ki Khasi, bad ki Garo. Kumta baroh ki dei ban ïoh mar ïaryngkat ban pynneh ïa ka jinglong hok bad jingïatylli ha ka jylla.
Ka Union ka pynpaw ïa ka jingshisha ba ka thaiñ rilum Jaiñtia ka dang ïai sah ha ka jingduna bad ka dang ïai bteng ban ïakynduh ïa ki jingeh kiba khraw ha ka liang ki jingtei. Ha kaba ïadei bad kane, ka jingai kyrdan ïa ka Jowai kum ka nongbah lyiur kan kyntiew ym tang ïa ka roi ka par kaba ïahap kyrdan hynrei kan pynthikna ruh ïa ka jingïaryngkat hapdeng ki jaidbynriew, ong u kyrwoh ba la phah da u General Secretary ka JSU Bah Neilkee Mukhim.