Noh synñiang ka Star Cement T.25 lak sha ka Meghalaya CM Relief Fund ban kyrshan ïa ki lanot

Shillong, Naitung 09: Ka Star Cement kawei na ki kompeni dewbilat ba paw jong ka thaiñ dang shen ka la noh synñiang haduh T. 25 lak sha ka Chief Minister’s Relief Fund, Meghalaya naka bynta ban ïarap ïa ki lanot shlei um kiba la shah ktah ha ki bynta bapher bapher jong ka jylla.
Na ka liang jong u Chief Minister ka Jylla u Conrad K Sangma, u la ïaroh ïa ka Star Cement halor kane ka sien jam kaba ka la shim ban ïarap na ka bynta ki longïing kiba ngat ha ka lanot na ka jinglynshop ka mariang, kaba la pynjulor ïa ki ïing ki sem, ki lynti, ki synkieng, ki jaka paidbah bad ki skul ruh kumjuh.
Haba kren halor kane ka phang na ka liang jong u Rajendra Chamaria, Vice Chairman & Managing Director, Star Cement, u la ong ba ka Star Cement barapor ka aiti ïalade naka bynta ban shakri sha ki paidbah ka jylla ha ki por jong ka jingdonkam.
U Shree Tushar Bhajanka, Executive Director ka Star Cement u la pynpaw ïa ka jingsngewkhia halor ka jingïakynduh jingeh jong ki paidbah bad u la ong ba haba ka mariang ka wanrah ïa ka jingjulor ka long kaba dei ba baroh ki dei ban ïa ï eng lang kawei ban ïarap mar kylliang.
La aiti ia ka Cheque, sha u Chief Minister ka Jylla u Conrad K Sangma da u Shree Suresh Shovasaria, Senior Executive, Star Cement. Na ka liang jong ka Star Cement ka kyrpad ia baroh ki para nongshnong shnong ban ïasnohkti lang ban kyrshan ïa kito kiba shem lanot.