Mawkyrwat, Ïaïong, 24: Ka Meghalaya Comercial Truck Owner & Driver Association (MCTO&DA) South West Khasi Hills District ha ka sngi Palei da ka jingïasynñiang para ma ki, ki la leit ban noh synñiang ha ki ar tylli ki jaka, kata kawei ka dei sha ka lanot pluh ïing bad kawei pat ïa ki dukan ïew Mawkyrwat kiba la shah jynrat ha ka ‘eriong ha kine ki khyndiat sngi.
Kum ban shu pynkynmaw ka Meghalaya Truck Owner & Driver Association kaba dei kawei na ki shnad treikam jong ki trai kali trok bad ki nongñiah trok ha kaba kane kane ka kynhun ka la jan dap 1 snem naduh ba la pynkha tnad hapoh ka South West Khasi Hills District bad ka la leh shibun ki kam ban noh jingïarap sha ki lanot kiba ïa kynduh ïa ki jingeh bad jingsngewsih.
Ïa ka kynhun ban leit noh jingïarap la ïalam da u bah Robinsing Wahlang uba dei u President bad u bah Philandar Thongni uba dei u Secretary jong ka MCTO&DA. Na ka liang jong ki ki la pynpaw ruh ba kim shym la don kino kino ka jingïarap na kiwei pat hynrei haba ki tip ba ki para briew ki ïa kynduh ïa ki jingjia ba sngewsih ma ki hi ki ju ïa synñiang para ma ki ban pynmih ïa u synñiang bad nangta ki sa leit pat ban noh jingïarap sha ki lanot.
Ka jingleit ban noh synñiang jong ka Meghalaya Truck Owner & Driver Association ka dei da ki tin sop ïing ryngkat ka song pisa ïa ki trai dukan ha ïew Mawkyrwat ha kaba kine ki trai dukan ha ïew Mawkyrwat ki kynthup ïa ka kong Riba Syiemlieh bad jong u bah John Robert. Haba ïa dei bad ka longïing kaba la ngat ha ka apot pluh ïing ka seng ka la noh da ka song pisa bad kane dei ka ïing jong ka kong Brilsila Kharsyiemiong bad u bah Jmingstone Lyngkhoi na ka shnong Mawblei, South West Khasi Hills District kaba la jia pluh ïing ha ka 4 tarik u Lber, 2025.
Haba kren ha kane ka sngi, u bah Philandar Thongni, Secretary jong ka Meghalaya Truck Owner & Truck Association u la ong ka seng jong ki kam dei ka seng kaba peit tang ïa ka jingkamai ïa lade hynrei ka kwah ruh ban peit ïa ki longïing kiba mat bad ïa kynduh ïa ki jingeh la ka dei ha ki pluh ïing, la ka dei ha ka jingjynrat ki iing ha ka ‘erïong ne wat ha ka shitom jynjar ruh kum juh.
Shuh shuh u la ong ruh ba ka jingai jingïarap jong ka kynhun ïa kum kine, ka dei ruh ka jingpynïajan ïa ki paidbah bad ki nongñiah trok ne ki trai kali trok namar kumba ka paw ha ki por ba la leit ki kynthei khynnah ki ju ïoh tieng ïa ki nongñiah trok bad ki trok.
