Noh synniang bad ai mynsiem ka Leh Isynei Lem ïa i heprit Ibapynhun Ïawphniaw

Mawkyrwat, ‘Naitung 19: Ka Kynhun Leh Isynei Lem (KLIL) kawei na ki kynhun kaba la ju don bynta ha kiba bun ki kam leh bha na ka bynta ki briew kiba donkam ki lad jingïarap mynta ka kynti ki la leit ban ai mynsiem ryngkat ka jingnoh synñiang ïa kawei ka longïing ha kaba iwei na i khun jong ki i la shah bat ha ka bording electrik ha shnong Mawkohphet, South West Khasi Hills District.
Lah ban pynpaw ba tang hadien shitaïew ba i heprit Ibapynhun Iawphniaw i la wan phai na ka jingphah sumar hapoh North Eastern Indira Gandhi Regional Institute of Health and Medical Sciences (NEIGRIHMS), Shillong namar ka jingshah bat ha ka bording electrik ha ka machine uba don ha Mawkohphet, South West Khasi Hills District i ba la duh noh ïa baroh ar tylli ki kti bad lah ban ong ba ka jingduh jong i ïa baroh ar tylli ki ka la long ka jingduh noh kaba khraw ha kiba bun bah ki liang.
Namarkata, halor kane ka bynta ka Kynhun Leh Isynei Lem na ka shnong Mawten, South West Khasi Hills District kaba ki dkhot jong kane ka kynhun kiba don baroh kumba 25 ngut ei ei bad kaba dei kawei na ki kynhun ba ju ïarap bad noh jingïarap na ka bynta ki longïing jong ki ‘riew kynthei kiba shem lanot bad ki khunswet, mynta ka sngi ka 19 tarik u ‘Naitung, 2022 hapoh ka jingïalam jong u President, bah K.L. Lyngdoh ki la leit ban ai mynsiem ïa kane ka longïing bad ban ïasnohkti lem bad kane ka longïing kum shibynta ban kin nym duh jingkyrmen wat la i khun ki jong ki i la duh ïa ki kti jong ka.
Haba kren ha kane ka sngi, u bah K.L. Lyngdoh, President ka Kynhun Leh Isynei Lem u la pynpaw ka jingsngewkmen ban ïoh ïa don lem bad ki kum ka ïing ka sem ha kum kane ka por bad u la ai khublei ruh na ka bynta baroh ki para dkhot kiba la ïapoi lang ban ïa synrang lem kum ka dak jong ka jingsngewlem halor kane ka jingjia. “Ngi wan hangne mynta da ka mynsiem jong ka jingieit bad sngewlem ïa kane ka ïing ka sem bad kyrpang na ka bynta i hep iba rit iba la duh noh ïa baroh ar tylli ki kti na ka daw jong ka jingshah bat ha ka bording”, ong u bah Lyngdoh.
U la ong ruh ba ki wan ha kane ka sngi tang kum ka dak jong ka jingïadon bynta lem ban ai ïa u synñiang uba rit eh, hynrei to pdiang ïa kane da ka mynsiem jong ka jingieit bad jingkmen namar watla i long i jingai iba rit hynrei in long i jingkyrkhu. Namarkata, u la ai ka jingkyrkhuh kyrdoh bad kitbok kitrwiang na ka bynta ka ïing ka sem baroh kawei bad na ka bynta i hep rit ba in nang ïoh ïa ki met kiba koit ba khiah ha ki sngi ki ban dang wan.
Ban shu pynkynmaw kane ka Kynhun Leh Isynei Lem ka dei ka kynhun kaba la noh shibun ki jingïarap sha ki longïing kiba duk ba kyrduh khamtam ïa ki longïing jong ki ‘riew kynthei kiba jynjar bad ki khunswet bad dang ha kine ki khyndiat bnai kane ka kynhun ka la pynshna ïing ïa kawei ka ‘riew kynthei kaba la shu thiah pang ha jingthiah bad kane ka kynhun kam don pat ka jingïohi ïa kano kano ka nongkylliang na kiwei hynrei ha kaba ki leh ïa ki kam na ka bynta kiwei da kaba ïa synñiang para dkhot.