Shillong, Naitung 12: U MLA ka Mawlai Konstitwensi u Bah Process T Sawkmie u la nohjingïarap da ka song pisa sha ki nongïalehkai Karate ka All Meghalaya Karatedo Association (AMKA), ban ïa don bynta lang ha ka jingleit ïakhun ka jong ki sha Chattisgarh.
Kitei ki khynnah karate kiba ïoh jingïarap ki kynthup ïa ka Barisha Kharbani, ka Rebecca Nongspung bad u Francis Marbaniang. Katkum kine ki khynnah, ki la ïathuh ba kane ka jingïalehkai kan sdang ha ka 15 bad 16 tarik u Naitung, 2022. Haba kren bad ki lad pathai khubor ki la pynpaw ba ki la pynkhreh bha bad ka thong jong ki ha ka long ban ïoh khur takma ha kane ka rynsan ïakhun.
Haba ïa dei bad kane ka jingleit jong ki u Bah PT Sawkmie u la kitbok kitrwïang ïa ki ba kin ïoh khur ïa ka jingjop ban ïoh khur takma bad ban wanrah nam bad burom ïa ka Mawlai, kumjuh ïa ka jylla hi baroh kawei.
Ïa katei ka song pisa u la aiti sha ki ha ophis treikam jong u ha Mawlai Nongpdeng ha ka jingdon ryngkat u bah Homer Kharkongor, u president ka UDP Mawlai Circle.
