Khliehriat, Nailur 15 : Ka Meghalaya People United Front (MPUF) EJHD, kaba hapoh ha ka jingialam jong u President, u bah Kyrshan Blah bad kiwei ki nongialam myn ha ka 13 tarik mynta u bbai kila leit ai jingiarap da ki tin sop iing bad kiwei kiei de ki tiar sha ka longiïng jong ka kong Telmi Rymbai kaba na ka shnong Mookhep EJHD kaba dei ka long ïing kaba kyrduh bad katei ka longkmie ka don ruh uwei u khunksiew uba don hapdeng ka jingshitom,.
U bah K. Blah haba kren u la ong, ba kane ka jingai iarap jong ka seng ka long kum shi bynta ban kyrshan lem ïaka jingeh jong kitei ki longiïng kaba mad ïa ka jingduk jingkyrduh ne ka bym ïohlad ban maramot ïa ki ïing ki sem jong ka kaba la pei la jot, kiba Suh im ja bad pyndap ïa ka ïing ka sem tang da kaba shu bylla sngi ha ki kam bylla bapher bapher, u la pynpaw ka jingsngew khia ruh ba hapdeng ka jingduk jingkyrduh katei ka longiïng ka ngat ruh sa kawei ka jingeh haba don ki dkhot ka ïing kiba don ha ka jingpang bapher bapher.
La ong ruh ba na ka liang kitei ki longiïng ki la pynpaw ba ki la ju leit mih sha ki nongmihkhmat jong ki bad pan jingiarap da ki tin kum ha ka ban maramot ïa ka ïing jong ki hynrei la bun sien ki la leit kim pat juh ïoh satia kano kano ka jingiarap. Kumta na ka liang ki dkhot jong katei ka long ïing ki la pynpaw ka jingsngewnguh bakhraw ïa ki nongïalam bad dkhot ka seng halor kane ka jingnoh jingiarap kaba long ka jingkyrkhu kaba khraw ïa ki.
